İbrahim Tatlısesin ağıl sağlamlığı yerindədir? - Məhkəmə qərarı açıqlandı

Türkiyənin məşhur sənətçisi İbrahim Tatlıses ilə oğlu Ahmet Tatlıses arasında bir müddətdir davam edən ailə gərginliyi məhkəmə qərarı ilə yeni mərhələyə keçib.

Sonxeber.az türk mediasına istinadən xəbər verir ki, məhkəmə, İbrahim Tatlısesi təhdid etdiyi iddiası ilə Ahmet Tatlıses barəsində uzaqlaşdırma qərarı çıxarıb və elektron qolbaq taxılmasına qərar verib.

Qərardan sonra səssizliyini pozan Ahmet Tatlıses, atası ilə uzun müddətdir heç bir əlaqəsinin olmadığını bildirib:

"Bəli, atam bir qərar alıb, hörmətlə yanaşıram. Təxminən bir ildir görüşmürük. Nə telefon, nə mesaj, heç bir ünsiyyətimiz yoxdur. Mən İstanbulda, o isə İzmirdə yaşayır. Fiziki yaxınlığımız belə yoxdur, amma yenə də belə bir qərar verilib, buna da hörmətlə yanaşıram", – deyə açıqlayıb.

Arabesk musiqisinin əfsanəsi sayılan İbrahim Tatlısesin ağıl sağlamlığı ilə bağlı oğlu tərəfindən açılan qəyyumluq (vesayet) davası da nəticələnib. Məhkəmə, davanı rədd edərək Tatlısesin ağıl sağlamlığının tam və öz işlərini idarə etməyə qadir olduğunu təsdiqləyib.

İbrahim Tatlısesin vəkilləri verdikləri açıqlamada bildiriblər ki, məhkəmə prosesində Ahmet Tatlısesin işlədiyi alçaldıcı ifadələr səbəbindən, ata və oğulun bir araya gəlməməsi üçün qoruma qərarı çıxarılıb.

Sənətçi İbrahim Tatlıses isə vəkili vasitəsilə verdiyi yazılı açıqlamada bəzi mətbuat orqanlarında yayılan xəbərlərin gerçəyi əks etdirmədiyini vurğulayıb:

"Son günlərdə mətbuatda müvəkkilimiz haqqında əsassız xəbərlər yayılır. Doğru məlumatlandırma üçün bu açıqlamanın verilməsi zəruri olub. Məhkəmə qərarı ilə müəyyən edilib ki, İbrahim Tatlısesin ağıl sağlamlığı tamdır, o, öz işlərini görmək və idarə etmək qabiliyyətinə malikdir. O, illər boyu ailəsi və sənəti üçün çalışan, öz əməyilə sərvət qazanmış bir insandır. Onun həyatını və qazandığı uğurları müzakirə etmək heç kimin haqqı deyil".

Telegramda izləyin