"Azərbaycan tolerantlığı dünyaya sülh, mərhəmət və birgəyaşayış mesajı verir" - DEPUTAT

"Azərbaycan tarixən müxtəlif millətlərin, dinlərin və mədəniyyətlərin nümayəndələrinin sülh, qarşılıqlı hörmət və humanizm şəraitində birgə yaşadığı nadir ölkələrdən biridir. Bu, xalqımızın əsrlərlə formalaşdırdığı mənəvi mədəniyyətin, dözümlülük və qarşılıqlı anlayış fəlsəfəsinin təbii nəticəsidir. Bu gün müstəqil Azərbaycan dövlətində milli və dini tolerantlıq dövlət siyasətinin prioritet istiqamətlərindən biridir. Bu siyasətin ideoloji əsasını Ümummilli Liderimiz Heydər Əliyev qoymuşdur. Ulu Öndər Heydər Əliyev hələ sovet dövründə müxtəlif xalqların və dinlərin nümayəndələrinin hüquq və azadlıqlarını qorumaqla, Azərbaycanda milli həmrəyliyin və birgəyaşayış ənənələrinin inkişafına xüsusi önəm vermişdi. Müstəqilliyin bərpasından sonra tolerantlıq və multikulturalizm prinsipləri dövlət ideologiyasının ayrılmaz tərkib hissəsinə çevrildi".

Bu sözləri Sonxeber.az-a Milli Məclisin deputatı, Ana Vətən Partiyasının sədr müavini Günay Ağamalı danışıb.

O, açıqlamasında qeyd edib ki, Ulu Öndərimiz Heydər Əliyevin uzaqgörən siyasətini bu gün eyni rasional yanaşma ilə Möhtərəm Cənab Prezident İlham Əliyev uğurla davam etdirir:

"Dövlət başçımızın rəhbərliyi ilə Azərbaycan nəinki bölgədə, o cümlədən dünyada da tolerantlıq və multikultural dəyərlərin beşiyi kimi tanınır. Ölkə başçımız Cənab İlham Əliyevin təşəbbüsü ilə ölkəmizdə "Multikulturalizm ili", "İslam Həmrəyliyi ili" elan edilməsi, Bakıda keçirilən Dünya Dini Liderlərinin Zirvəsi və beynəlxalq humanitar forumlar Azərbaycanın qlobal səviyyədə dialoq və anlayış mərkəzinə çevrilməsini təmin edib.

Birinci vitse-prezident Mehriban xanım Əliyeva da öz növbəsində mədəniyyətlərarası dialoqun, dini irs və mənəvi dəyərlərin qorunmasının memarı kimi fəaliyyət göstərir. Mehriban xanım Əliyevanın rəhbərlik etdiyi Heydər Əliyev Fondu tərəfindən müxtəlif dinlərə məxsus ibadət məbədlərinin bərpası, mədəniyyət abidələrinin qorunması və dünyada sülhün təşviqi sahəsində görülən işlər Azərbaycan tolerantlığının bəşəri miqyasda nümunəyə çevrilməsində mühüm rol oynayır".

Deputat onu da vurğulayıb ki, bu gün ölkəmizdə bütün dini və milli icmalar bərabərhüquqlu şəkildə fəaliyyət göstərir, insanlar inanc və mənsubiyyətindən asılı olmayaraq, eyni dəyərlər ətrafında birləşirlər:

"Bu, dövlət siyasətinin və Azərbaycan xalqının mənəvi kodunda yaşayan humanizmin və qarşılıqlı hörmətin təzahürüdür. Təsadüfi deyil ki, 44 günlük Vətən Müharibəsi zamanı ölkəmizdə yaşayan müxtəlif xalqlara və dinlərə mənsub vətən övladları məhz üçrəngli şanlı bayrağımız altında dəmir yumruq kimi birləşərək siyasi, dini, tarixi ədaləti bərpa etdi. Bu inam və etimad illər ərzində aparılan doğru, məqsədyönlü siyasətin yaratdığı reallıqlarıdır. Azərbaycan tolerantlığı dünyaya sülh, mərhəmət və birgəyaşayış mesajı verir. Bu dəyərləri qorumaq, gələcək nəsillərə ötürmək isə hər birimizin borcudur".

Vüsalə İbrahimli

P.S. Yazı Azərbaycan Respublikası Medianın İnkişafı Agentliyinin maliyyə dəstəyi ilə "Dini və milli tolerantlıq, millətlərarası münasibətlərin inkişaf" mövzusuna uyğun olaraq dərc edilir.

Telegramda izləyin