"Fəxr hissi ilə qeyd edirəm ki, bu gün Kəlbəcər rayonu özünün intibah dövrünü yaşayır" - DEPUTAT

"Kəlbəcər rayonunun işğaldan azad olunması Möh­tərəm Prezident İlham Əliyevin uzaqgörən siyasətinin, polad iradəsinin, hərbi gücün və strateji planlananın uğurlu nəticəsidir".

Bunu Sonxeber.az-a Milli Məclisin deputatı, Ana Vətən Partiyasının sədr müavini Günay Ağamalı danışıb.

O, açıqlamasında qeyd edib ki, Kiçik Qafqaz dağlarının qoynunda yerləşən Kəlbəcər rayonu zəngin yeraltı sərvətləri, göylərə ucalan meşələri, saf bulaqları, qarlı zirvələri ilə Azərbaycan təbiətinin şah əsəridir:

"İşğala qədər Kəlbəcər rayonunda 53478 sakinin yaşadığı 1 şəhər, 1 qəsəbə, 145 kənd və 55 inzibati ərazi dairəsi mövcud idi. Hələ SSRİ dövründə rayon müalicəvi bulaqları, müalicə kompleksləri, zəngin flora və faunası ilə şöhrət qazanmış, imperiyanın hər yerindən olan insanların diqqətini çəkməyi bacarmışdı. Lakin ötən əsrin sonlarına yaxın Azərbaycan və Ermənistan arasında münasibətlərin gərginləşməsi və ermənilərin işğal siyasəti Kəlbəcər rayonundan da yan keçmədi. 1993- cü il il 2 aprel tarixində Ermənistan silahlı qüvvələri tərəfindən işğal olunan Kəlbəcər rayonu düşmənin vandalizminin növbəti qurbanı oldu. İşğal zamanı 511 dinc sakin öldürüldü, 321 nəfər əsir götürüldü və itkin düşdü. İşğal nəticəsində Kəlbəcərin əhalisi respublikanın 56 rayonunun 770 yaşayış məntəqəsində müvəqqəti məskunlaşmağa məcbur oldu. İşğal nəticəsində onlarla tarixi-mədəniyyət abidəsi, 97 məktəb, 9 uşaq bağçası, 116 kitabxana, 43 klub, 42 mədəniyyət evi, tarix-diyarşünaslıq muzeyi, 9 xəstəxana, 75 tibbi məntəqə, 23 ambulatoriya, 9 aptek, yüzlərlə inzibati bina, minlərlə mənzil, yüzlərlə maşın, texnika və s. talan edildi, dağıdıldı və rayonun milyardlarla manatlıq sərvəti Ermənistana daşındı. BMT Təhlükəsizlik Şurası 1993- cü ildə Kəlbəcərin işğalı ilə bağlı 822 saylı qətnamə qəbul etsə də nə işğalçı Ermənistan bu qətnaməyə nə məhəl qoydu, nə də beynəlxalq təşkilatlar İrəvandan bunu tələb etmədi. Əksinə, davamlı xarakter almış işğal və qeyri-qanuni məskunlaşma prosesi həyata keçirildi. Bununla yanaşı, Kəlbəcər ərazisində olan yeraltı sərvətlər, xüsusilə, qızıl yataqları kütləvi şəkildə istismar edildi və əldə olunan vəsait işğalçılarının büdcəsinə yönləndirildi. Lakin, bütün bunlara baxmayaraq Azərbaycan xalqı və onun siyasi lideri, Silahlı Qüvvələrimizin Ali Baş Komandanı cənab İlham Əliyev bir gün belə Kəlbəcər rayonunun və bütün işğal altında olan bölgələrimizin azad olunacağı günlə bağlı ümidini üzmədi. Əzmlə, qətiyyətlə və sonsuz səbrlə bizləri addım-addım o tarixi anlara yaxınlaşdırdı. 2020-ci ildə 44 gün ərzində məhz Azərbaycan tarixinin ən parlaq səhifələri yazıldı. Ali Baş Komandan Cənab İlham Əliyevin dəmir iradəsi, uzaqgörən siyasəti və diplomatik ustalığı, eyni zamanda Azərbaycan əsgərinin gücü, döyüş ruhu, peşəkarlığı xalqımızı tarixi ədalətə qovuşdurdu. Məhz ölkə başçımızın rəhbərliyi ilə Azərbaycan Ordusu İkinci Qarabağ Müharibəsində möhtəşəm qələbə qazandı, işğalçı Ermənistan kapituliyasiya aktına imza atmağa məcbur edildi və Kəlbəcərin də boşaldılması öhdəliyini qəbul etdi. 28 il ərzində düşmən tapdağı altında qalan Kəlbəcər rayonu Azərbaycanın diplomatik gücünün və Vətən Müharibəsində qazanılmış məntiqi nəticəsi olaraq bir güllə belə atılmadan azad edildi. Fəxr hissi ilə qeyd edirəm ki, bu gün Kəlbəcər rayonu özünün intibah dövrünü yaşayır. Ölkə başçısının diqqət və qayğısı sayəsində "Böyük Qayıdış" Proqramı çərçivəsində rayonda genişmiqyaslı bərpa və quruculuq işləri həyata keçirilir, sakinlərin qayıdışı üçün ən son standartlara uyğun yaşayış kompleksləri tikilir. Bütün bunlar məhz dəmir iradənin simvoldur.

Kəlbəcər artıq azaddır və təhlükəsizdir".

Vüsalə İbrahimli

Telegramda izləyin