"İsrail kəşfiyyatının regiondakı aktivliyi Tehran tərəfindən daim birbaşa təhlükə kimi qiymətləndirilir" - AÇIQLAMA

Bir neçə gün öncə İran Kəşfiyyat Nazirinin bəyanatı böyük əks-səda doğurdu. Xarici düşmənlərin, İranın Dini Lideri Ayətullah Seyid Əli Xamneyiyə qarşı sui-qəsd və ya hücum hazırlığında olduğu bildirildi. Bunu İranın Kəşfiyyat Naziri Seyid İsmayıl Xətib deyib. Xətib həmçinin, onların məqsədinin İranda qeyri-sabit vəziyyət yaratmaq olduğunu qeyd edib.

Mövzunu Sonxeber.az-a politoloq Tural İsmayılov şərh edib.

O, açıqlamasında qeyd edib ki, bir neçə gün öncə səslənən bu iddia daha çox informasiya təhlükəsizliyi kontekstində oxunmalıdır:

"Belə açıqlamalar adətən həm daxili auditoriyanı səfərbər etmək, həm də xaricə siyasi mesaj vermək məqsədi daşıyır. İran üçün əsas risk mənbələri uzun illərdir İsrail və ABŞ xətti üzrə formalaşan qarşıdurma mühitidir. Xüsusilə İsrail kəşfiyyatının regiondakı aktivliyi Tehran tərəfindən daim birbaşa təhlükə kimi qiymətləndirilir. Bununla yanaşı, bəzi regional oyunçuların da dolayısı yollarla proseslərdə maraqlı ola biləcəyi istisna edilmir. Ancaq konkret faktlar açıqlanmadığı üçün hansısa ölkəni birbaşa ittiham etmək hələlik mümkün deyil. "12 günlük müharibə" zamanı belə bir addımın atılmaması təhlükəsizlik sisteminin həmin dövrdə maksimum səfərbər olunduğunu göstərir. Sonrakı aylarda risklərin artması ehtimalı isə daha çox kəşfiyyat məlumatlarının dinamikası ilə bağlı ola bilər. İran daxilində müxtəlif institusional mərkəzlər arasında rəqabət də bəzən bu tip sərt bəyanatları stimullaşdıra bilər. Belə açıqlamalar eyni zamanda mümkün etiraz dalğalarının qarşısını almaq üçün psixoloji baryer rolunu da oynayır. Xarici kəşfiyyatların İrana marağı yalnız lider faktoru ilə məhdudlaşmır və daha geniş geosiyasi çərçivəyə söykənir. Məhz buna görə də bu cür iddialar təkcə təhlükəsizlik yox, həm də diplomatik müstəvidə oxunmalıdır. Tehran bu mesajla əslində həm daxili stabilliyi möhkəmləndirməyə, həm də rəqiblərinə xəbərdarlıq etməyə çalışır. Yekunda isə demək olar ki, indiki mərhələdə səslənən ittihamlar real təhlükədən çox preventiv siyasi xəbərdarlıq xarakteri daşıyır".

Telegramda izləyin