"Ramiz Mehdiyevin Əli Kərimli ilə siyasi koordinasiyası Azərbaycan siyasətində köhnə üsulların yenidən canlandırılması cəhdidir" - DEPUTAT

"Ramiz Mehdiyevin Əli Kərimli ilə siyasi koordinasiyası Azərbaycan siyasətində köhnə üsulların yenidən canlandırılması cəhdidir. Hər ikisinin yaxınlaşması dövlətimiz üçün açıq şəkildə təhlükədir. Çünki bu ittifaq milli maraqlara və inkişafına deyil, şəxsi və qrup maraqlarına xidmət etmək üçün qurulub".

Bunu Sonxeber.az-a Milli Məclisin deputatı Müşfiq Cəfərov danışıb.

O, açıqlamasında qeyd edib ki, Uzun illər ərzində xarici anti-Azərbaycan qüvvələrinin əlində oyuncaq olan və onlar tərəfindən idarə edilən Əli Kərimli və onunla eyni mənsəbə qulluq edən digər "milli" satqınlar son beş ildə Azərbaycanın əldə etdiyi böyük tarixi qələbələrə kölgə salmaq və xarici mərkəzlərin bu yöndə apardığı fəaliyyətlərə dəstək vermək üçün çalışıblar:

"Onların əsl siması Azərbaycan cəmiyyətinə məlumdur. Cəmiyyətdən heç bir dəstək görməyən Əli Kərimli bütün ümidini indiyə qədər onu bəsləyən xarici anti-Azərbaycan qüvvələrinə bağlayıb. Əli Kərimlinin evində axtarış aparılması, Rusiyaya yazılan məktubun və həmin müraciətin ortaya çıxması artıq adi haldır. Bu hadisə dəfələrlə təkrarlanıb. Ramiz Mehdiyevin "5-ci kolonu" Azərbaycanda hər zaman ölkənin inkişafına mane olan bir qüvvə olub.

Bir zamanlar hakimiyyətin tərəfdarlarından olan, prezident seçkilərində cənab İlham Əliyevi müdafiə edən, onun haqqında uzun çıxışlar edən Gültəkin Hacıbəyli birdən-birə müxalifət olmaq qərarına gəldi. Bu sualın cavabı da Ramiz Mehdiyev işində bizə məlum oldu. Bir daha əmin olduq ki, özünü xalq fədailəri kimi göstərənlər əslində ancaq öz mənfəətlərini güdürmüşlər.

Ramiz Mehdiyev vəzifədə olduğu müddətdə AXCP və "Milli Şura" hər 3 aydan bir mitinq, aksiya təşkil edirdi. Lakin 2019-cu ildə Ramiz Mehdiyev vəzifəsindən azad olunduqdan sonra AXCP və "Milli Şura" bir dəfə də olsun nə mitinq, nə də aksiya keçirmədi. Eyni zamanda, Əli Kərimli heç zaman hər hansı bir çıxışında birbaşa Ramiz Mehdiyevi tənqid etməyib. Ramiz Mehdiyev Əli Kərimli, Cəmil Həsənli, Gültəkin Hacıbəyli, eyni zamanda şər-böhtan yayan mühacir mətbuatı ilə birlikdə Azərbaycana qarşı hər zaman təxribat aparsa da, heç zaman uğur qazanmağa nail ola bilməyib. Çünki xalq onlara inanmır və həqiqəti görür".

Telegramda izləyin