"Qız qaçırma" mübahisəsi qanla bitdi: 16 yaşlı oğul öldürüldü, ata ağır yaralandı - VİDEO

Türkiyənin Adana şəhərinin Yüreğir rayonunda "qız qaçırma" məsələsi zəminində yaranan ədavət faciə ilə nəticələnib.

Sonxeber.az türk mediasına istinadən xəbər verir ki, hadisə Yüreğir rayonunun Havutlu məhəlləsində baş verib. Məlumata görə, Bekir Y. (43) və oğlu M.Y. (16) aralarında "qız qaçırma" mövzusu səbəbindən düşmənçilik olan bir şəxsin silahlı hücumuna məruz qalıblar. Üzünü kapüşonla gizlədən şübhəli şəxs qaçaraq ata və oğula yaxınlaşıb və tapança ilə dəfələrlə atəş açaraq hadisə yerindən qaçıb.

Atəş nəticəsində ata və oğlu qan içində yerə yıxılıb. Dəhşətli anlar təhlükəsizlik kameraları tərəfindən qeydə alınıb. Hadisə barədə məlumat daxil olduqdan sonra əraziyə təcili tibbi yardım və polis əməkdaşları göndərilib.

Xəstəxanaya çatdırılan 16 yaşlı M.Y. həkimlərin bütün səylərinə baxmayaraq xilas edilə bilməyib. Ata Bekir Y.-nin müalicəsi isə davam edir. M.Y.-nin meyiti yarılma üçün Adana Məhkəmə-Tibbi Ekspertiza İdarəsinin morquna aparılıb.

Hadisəni törədən və qaçan şübhəlinin tutulması üçün polis əməkdaşları genişmiqyaslı axtarış əməliyyatını davam etdirir.

Telegramda izləyin