Teoman: "Anam müğənni olduğuma görə utanır"

Türk rok musiqisinin tanınmış simalarından olan müğənni Teoman anası ilə münasibətləri barədə diqqətçəkən etiraflar edib.

Sonxeber.az türk mediasına istinadən xəbər verir ki, Teoman anasının onun rok ulduzu olmasını illərdir qəbul edə bilmədiyini deyib. Teomanın sözlərinə görə, müğənni olmağa qərar verdiyi dövrdə anası uzun müddət bu vəziyyətə görə üzülüb və hətta utanc hissi keçirib. "Mən müğənni olanda anam illərlə buna görə məyus oldu və utandı. Hələ də gördüyüm işi bəyənmir, bunu mənə yaraşdırmır", - deyə sənətçi qeyd edib.

"Paramparça", "Zamparanın Ölümü", "Kupa Kızı ve Sinek Valesi" kimi məşhur mahnıları ilə Türk rok musiqisində özünəməxsus yer qazanan Teoman bu açıqlamaları aparıcı Ahmet Mümtaz Taylanın təqdim etdiyi "Empati" proqramında səsləndirib. Veriliş zamanı sənətçi uşaqlıq illərindən başlayaraq musiqi karyerasına gedən yolundan, ailə münasibətlərindən və gündəlik həyatından səmimi şəkildə danışıb.

Teoman həmçinin ailəsinin onun sənət seçiminə yanaşmasının zamanla dəyişmədiyini vurğulayıb və buna baxmayaraq, öz yolunda irəliləməyə davam etdiyini bildirib. Sənətçinin bu etirafları sosial şəbəkələrdə və media məkanında maraqla qarşılanıb, izləyicilər arasında geniş müzakirələrə səbəb olub.

Telegramda izləyin