"Elə qanun hazırlanmalıdır ki, publarda baş verən əxlaqsızlıqların qarşısı kökündən alınsın" - SOSİOLOQ

Son illər əyləncə məkanlarında diqqət çəkən təhlükəli bir tendensiya formalaşıb: bəzi publar və restoranlar artıq səviyyəli musiqi, keyfiyyətli xidmət və sağlam mühitlə deyil, açıq-saçıq geyimlər, vulqar səhnə hərəkətləri və sosial şəbəkələr üçün qəsdən yayılan qalmaqallı görüntülərlə müştəri toplamağa çalışırlar. Sanki sənət ikinci plana keçib, ucuz diqqət isə əsas reklam vasitəsinə çevrilib.

Bu yanaşma təkcə estetik zövqü korlamır, həm də cəmiyyətin mənəvi mühitinə təsir göstərir. Sosial şəbəkələrdə məqsədli şəkildə yayılan bu görüntülər adi əyləncə reklamı kimi təqdim olunsa da, əslində daha çox reytinq xatirinə sərhədlərin pozulmasıdır. Nəticədə, ailəvi mühitə uyğun məkan anlayışı zəifləyir, gənclərə isə yanlış nümunələr ötürülür.

Bəs görəsən əyləncə adı altında yayılan bu görüntülərin qarşısını almaq üçün hansı addımlar atılır?

Sosioloq Mətanət Məmmədova bu barədə Sonxeber.az -a açıqlama verib:

"Bu gün hara baxırıqsa, vulqar görüntülərlə üz-üzə qalırıq. Sosial şəbəkələrdə adi bir axtarış edirsən, ilk qarşına çıxan mənəviyyatı tapdalanmış, əxlaq sərhədlərini aşmış görüntülər olur. Canlı yayıma çıxıb bədənini reklam edən, qiymət deyən qadınlar artıq adi mənzərəyə çevrilib. Və bu, təkcə ekranda qalan bir görüntü deyil - bu, birbaşa insanların düşüncəsinə, ailələrinə, gələcəyinə təsir edən təhlükəli bir prosesdir.

Düşüncəsi aşağı olan bəzi insanlar artıq açıq-aşkar belə qənaətə gəlirlər ki, müştəri cəlb etməyin, diqqət çəkməyin yolu məhz bu vulqar davranışlardan keçir. Bunun nəticəsində isə həyat yoldaşı, ailəsi olan, namusla yaşayan qadınlar belə cəmiyyət içində narahatlıq yaşayır. Çünki normal ilə anormallıq arasındakı sərhəd silinib.

Getdikcə Azərbaycan öz simasını itirir. Restoranlarda, publarda, toylarımızda gənclərin sərgilədiyi xoşagəlməz, nəzarətsiz hərəkətlər də bu acı mənzərənin tərkib hissəsidir. Onlar sanki özündən çıxmış, kim olduqlarını unutmuş kimi davranırlar. Baxanda adam düşünür: bu insan özündə deyil. Daha acısı isə odur ki, bütün bunlar cəmiyyət tərəfindən adiləşdirilib, "normaldır" adı altında qəbul edilir.

Amma bu normal deyil!
Bu, bizim xalqın dəyəri deyil!
Bu, bizim mədəniyyətimiz deyil!

Bütün bu halların qarşısını almaq üçün Azərbaycanda yeni və çox ciddi bir mexanizm yaradılmalıdır. Çünki bu xalqın mənəvi dəyərləri gözümüzün önündə əldən gedir. Bilmirəm bunun adı cərimə olacaq, qadağa olacaq, yoxsa hətta həbs mexanizmləri - amma mütləq tədbir görülməlidir. Elə bir qanun hazırlanmalıdır ki, publarda, restoranlarda, ictimai məkanlarda baş verən əxlaqsızlıqların qarşısı kökündən alınsın.

Biz mənəviyyatımızı çöldən tapmamışıq. Bizim mənəviyyatımızın əsrlərlə formalaşmış tarixi var. Müasirlik və mədəniyyət adı altında soyunmaq, çılpaq gəzmək, əxlaq sərhədlərini aşmaq heç vaxt mədəniyyət olmayıb. Bir xalqın mədəniyyəti onun geyim tərzində, davranışında, özünü aparmaq qabiliyyətində əks olunur. Mədəniyyət budur!

Milli mentalitetin üstündən xətt çəkmək nə müasirlikdir, nə də inkişaf. Bu, sadəcə dəyərlərin məhvidir.

Hər zaman demişəm, yenə də deyirəm: yeni mexanizm hazırlanmalıdır və bu mexanizm son dərəcə sərt olmalıdır. Əgər biz cəmiyyətimizi gələcəyə aparmaq istəyiriksə, qaydalar ciddiləşməli, cərimələr yüksək həddə tətbiq olunmalıdır. Bu, dünyanın inkişaf etmiş ölkələrinin praktikasında var. Hansı qaydanı tətbiq etmək istəyiblərsə, ilk növbədə cərimələrdən başlayıblar.

Çünki insan cəmiyyəti olan yerdə cəza və məsuliyyət yoxdursa, orada nə intizam olar, nə də inkişaf.

Bəs bizim uşaqlarımız niyə sosial şəbəkələrdə bu vulqar görüntüləri görməlidir? Onlar hansı dəyərlərlə böyüyür? Hansı cəmiyyətin gələcəyini qururlar?

Bu mövzuda illərdir danışırıq, amma nəticə yoxdur. Artıq söz yox, əməl vaxtıdır. Bu halların qarşısını yalnız və yalnız real cəza və ciddi cərimələrlə ala bilərik. Cəmiyyətə, mentalitetə, milli dəyərlərə zərbə vuran hər bir davranış cavabsız qalmamalıdır.

Əks halda, susduqca itirəcəyik.
Susduqca dəyərlərimiz əlimizdən gedəcək".

Çiçək Sadatova

Telegramda izləyin