"Azərbaycan müstəqil və qarşılıqlı faydalı əməkdaşlığa əsaslanan xarici siyasət həyata keçirir" - DEPUTAT

Dünyanın aparıcı siyasi liderlərini, biznes nümayəndələrini bir araya gətirən Davos İqtisadi Forumu bir qayda olaraq növbəti illər üçün iqtisadi perspektivləri, çağırışları və tendesiyaları müəyyənləşdirən əhəmiyyətli platformadır. Yanvarın 19-da sözügedən tədbirdə iştirak üçün İsveçrənin Davos şəhərinə səfər edən cənab Prezident İlham Əliyev forum çərçivəsində olduqca əhəmiyyətli görüşlər keçirir, vacib fikirlər səsləndirir.

Dövlət rəhbərimizin dünyanın aparıcı media quruluşlarından biri olan "Euronews" televiziyasına verdiyi müsahibə məhz onun şəxsinə göstərilən yüksək diqqət və ehtiramın göstəricisidir. Artıq heç kimə sirr deyil ki, Möhtərəm cənab Prezident İlham Əliyev dünya miqyasında yüksək nüfuzu olan və hörmət bəslənilən liderlərdən biridir. Dövlət rəhbərimizin "Zayed İnsan Qardaşlığı Mükafatı" kimi nüfuzlu mükafata layiq görülməsi məhz uzun illər ərzində aparılan məqsədyönlü siyasətin, eyni zamanda regional sabitliyə verdiyi töhfələrin nəticəsidir. Beynəlxalq əhəmiyyətli məsələlərlə bağlı jurnalistin ünvanladığı suallara kifayət geniş, məzmunlu və reallıqlara əsaslanan cavablar verən ölkə başçısı bir daha dərin strateq olduğunu sübut etdi. Cənab Prezident İlham Əliyev qeyd etdi ki, "Bu gün Cənubi Qafqaz, həmçinin yeni inkişaf mərhələsinə daxil olur. Beş-altı aydır sülh şəraitində yaşayırıq. Buna öyrəşirik. Öz müstəqillik tariximizdə heç zaman sülh şəraitində yaşamamışıq. Xüsusi hissdir və əlbəttə ki, böyük fürsətdir. Bu gün Azərbaycan ilə Ermənistan arasında münasibətlər artıq əməkdaşlığa çevrilir. Ermənistana gedən yüklərin daşınmasında bütün məhdudiyyətləri aradan qaldırdıq. Bundan əlavə, Ermənistanın böyük dərəcədə asılı olduğu əsas malların, ilk növbədə neft məhsullarının həmin ölkəyə təchizatına başlamışıq. Bu vəziyyətdən hamı udur. Beləliklə, düşünürəm ki, Ermənistan və Azərbaycanın, eləcə də vətəndaş cəmiyyətinin birgə səyləri ilə Qafqazda uzunmüddətli deyil, əbədi sülhə nail olacağıq. Məqsədimiz budur. "

Bununla yanaşı ölkəmizin enerji potensialından və ixrac perspektivlərindən danışan ölkə başçısı Azərbaycanın 16 ölkəyə mavi yanacaq ixrac etdiyini, bunlardan 10-nun Avropa ölkəsi diqqətə çatdırdı. Səsləndirilən rəqəmlər qısa müddət ərzində görülmüş yüksək səviyyəli işlərin real mənzərəsidir. Sevindirici haldır ki, mövcud müsbət tendensiya artan templə davam edir.

Azərbaycan müstəqil və qarşılıqlı faydalı əməkdaşlığa əsaslanan xarici siyasət həyata keçirir. Bizim qətiyyətli və prinsipal mövqeyimizi lazımı qaydada dəyərləndirən dövlətlərlə kifayət qədər məhsuldar əlaqələr formalaşdırırıq. Lakin ölkəmizin uğurlarını və müstəqil xarici siyasətini qəbul etmək istəməyən qüvvələrdə kifayət qədərdir. Onlardan biri də Avropa Parlamentidir. Məsələ ilə bağlı cənab Prezident İlham Əliyev xanım jurnalistin sualına olduqca diplomatik cavab verdi. Dövlət başçısı bildirdi ki, Artıq uzun illərdir ki, Avropa Parlamenti və Avropa Şurasının Parlament Assambleyası ilə istənilən əməkdaşlığı dayandırmışıq. Avropa Komissiyası ilə əməkdaşlıq edirik və bununla kifayətlənirik.

Düşünürəm ki, Ermənistanın özünün Azərbaycanla əlaqələri yüksək qiymətləndirdiyi bir vaxtda, heç vaxt etmədiyimizdə, o cümlədən Ermənistana qarşı "təcavüzkar mövqedə" olmağımızda ittiham etməklə Avropa Parlamenti özünü çox qəribə vəziyyətə salır.

Ötən ilin avqustunda Ağ Evdə Azərbaycan və Ermənistan arasında sülh müqaviləsi paraflandı. Ümid edirəm ki, Avropa Parlamentinin üzvləri özlərində cəsarət taparaq Azərbaycana qarşı ədalətsiz mövqelərini yenidən nəzərdən keçirəcəklər.Bütün bunlar onu göstərir ki, Azərbaycan qlobal proseslərdə etibarlı və proqnozlaşdırılan tərafdaş kimi mövqeyini daha da möhkəmləndirir.

Günay Ağamalı

Milli Məclisin deputatı, Ana Vətən Partiyasının sədri

Telegramda izləyin