Masazırda qalmaqal: "Binə Çörək Zavodu"nun çörəyindən süpürgə çöpləri çıxıb - VİDEO

Abşeron rayonu Masazır qəsəbəsində yerləşən marketlərin birindən alınan çörəklə bağlı narazılıq gündəmə gəlib.

Sonxeber.az xəbər verir ki, bir müştəri aldığı çörəyin içindən yad cisimlər çıxdığını iddia edir.

Şikayətçinin sözlərinə görə, hadisə Masazır ərazisində fəaliyyət göstərən supermarket filiallarının birində baş verib. Alınan çörəyin üzərində istehsalçı kimi "Binə Çörək Zavodu" qeyd olunub. Ev şəraitində çörəyi kəsən zaman isə içərisindən süpürgə çöpünə bənzər sərt və nazik yad hissəciklərin çıxdığı bildirilib.

Müştəri bu halın həm gigiyenik baxımdan, həm də istehlakçı təhlükəsizliyi baxımından ciddi narahatlıq doğurduğunu deyir. Onun sözlərinə görə, çörək gündəlik istehlak olunan əsas qida məhsullarından biri olduğu üçün bu cür halların baş verməsi xüsusilə təhlükəli hesab olunur.

Hadisə ilə bağlı sosial şəbəkələrdə də paylaşımlar edildiyi və məsələni ictimailəşdirmək məqsədilə aidiyyəti qurumlara müraciət etməyə hazırlaşdığı bildirilir.

Məsələ ilə bağlı adı çəkilən satış şəbəkəsinin və istehsalçı müəssisənin mövqeyi hələlik açıqlanmayıb.

Qeyd edək ki, qida məhsullarının təhlükəsizliyinə nəzarət məsələləri Azərbaycan Respublikasının Qida Təhlükəsizliyi Agentliyinin səlahiyyətlərinə daxildir. Belə hallarla rastlaşan vətəndaşlara məhsulun qablaşdırmasını və qəbzini saxlamaq, həmçinin rəsmi qaydada şikayət etmək tövsiyə olunur.

Telegramda izləyin