Gözəl qoxu gəlsin deyə sobaya odekolon töküb alışqanla yandıran kafe sahibi faciənin bir addımlığından qayıdıb - VIDEO

Türkiyənin Dənizli vilayətində sobaya odekolon töküb alışqanla yandıran kafe sahibi faciənin bir addımlığından qayıdıb.

Sonxeber.az türk mediasına istinadən xəbər verir ki, hadisə Honaz rayonunun Kaklık məhəlləsində fəaliyyət göstərən "Söğütlüler" çayxanasında baş verib. Axşam saat 20:00 radələrində oğlu Mustafa Gezerə məxsus çayxanaya gələn Mehmet Gezer içəridəki sobanın tüstüləndiyini görüb. Soba bir cür alışmadığı üçün o, sobanın içindəki qazanı çölə çıxarıb. Müştərilərin narahat olmaması üçün məkanı havalandıran Gezer, eyni zamanda xoş qoxu yayılması məqsədilə həm masalara, həm də sobanın üzərinə odekolon töküb.

Bu zaman çayxanada olan bir nəfər ona odekolonu alışqanla yandırsa, daha yaxşı qoxu verəcəyini deyib. Bu məsləhətə əməl edən Mehmet Gezer sobanın üzərinə bir qədər də odekolon tökərək alışqanla yandırıb.

Gezerin sobanı yandırmasından sonra içəri daxil olan 4 müştəri sobanın yanındakı masaya əyləşib. Mehmet Gezer çölə çıxdıqdan cəmi bir neçə saniyə sonra isə soba güclü partlayışla partlayıb. Hadisə anbaan təhlükəsizlik kamerası tərəfindən qeydə alınıb.

Kadrlarda Mehmet Gezerin sobaya və ətrafa odekolon tökdüyü, daha sonra isə sobanın partlayaraq aşdığı görünür. Təhlükəli fikri verən şəxsin partlayış anında qaçdığı, sobanın yanında oturan 4 nəfərin isə bir müddət donub qaldığı diqqətdən yayınmayıb.

Hadisə ilə bağlı danışan Mehmet Gezer bildirib ki, belə bir nəticə ilə üzləşəcəyini heç düşünməyib:
"Axşam evdən çayxanaya gəldim. Qoxu olsun deyə sobanın üstünə odekolon tökdüm. Yanımdakı dost dedi ki, alışqanla yandırsan daha yaxşı qoxar. Mən də alışqanı çaxdım, sonra çölə çıxdım. Heç 10 saniyə keçməmiş içəridə güclü partlayış oldu. Sanki bomba partladı. İçəri baxdım, sobadan əsər-əlamət qalmamışdı. Odekolonun sıxılması səbəbindən soba partlayıb. Belə bir şey olacağını ağlıma belə gətirməzdim".

Partlayış zamanı sobanın yanında oturan müştərilərdən Mevlüt Özçelik isə hadisə anını belə təsvir edib:
"Axşam həmişəki kimi dostlarla oyun oynayırdıq. Çayxana sahibi sobanın üstünə odekolon tökürdü. Birdən güclü partlayış oldu. Şok yaşadıq. Ardınca üstümüzə his yağmağa başladı, onda qalxıb çölə çıxdıq. Partlayış anında nə baş verdiyini başa düşmədik, bir müddət yerimizdən tərpənmədik".

Xoşbəxtlikdən hadisə zamanı xəsarət alan olmasa da, baş verənlər böyük faciənin astanasından dönüldüyünü göstərib.

Telegramda izləyin