"ASPENDOS CATERING şirkəti qanunsuz işdən çıxarılma ilə bağlı AÇIQLAMA VERDİ: "Aşpaz yeyinti edib"

Xəbər verdiyimiz kimi, Gəncə şəhər sakini İsmayılov Təbriz Müslüm oğlu əmək hüquqlarının pozulduğunu iddia edərək media vasitəsilə şikayətini ictimailəşdirmişdi.

O bildirmişdi ki, "ASPENDOS CATERING" şirkətində rəsmi şəkildə baş aşpaz vəzifəsində çalışıb. Bazar günü qanuni istirahət günü olub və bu barədə rəhbərliyə əvvəlcədən məlumat verib. Lakin növbəti iş günündə, axşam saatlarında ona işdən azad edildiyi bildirilib.

Təbriz İsmayılov iddia edib ki, işdən çıxarılmasının səbəbini soruşduqda rəhbərlik konkret hüquqi əsas göstərməyib və yalnız "İki qoçun başı bir qazanda qaynamaz" ifadəsi ilə başqa bir aşpazla aralarında anlaşmazlıq olduğunu qeyd edib.

Şikayətçi məsələ ilə bağlı aidiyyəti qurumlara müraciət etməyə hazırlaşdığını bildirmişdi.

Məsələ ilə bağlı qarşı tərəf "ASPENDOS CATERING" şirkətinin təçhizatçısı Rəşad Əhmədxanov Sonxeber.az -a açıqlama verib.

Əhmədxanovun bildirdiyinə görə, Təbriz adlı şəxs müəssisənin mətbəxində aşpaz vəzifəsində çalışmış və hazırda da rəsmi ştat üzrə əməkdaşdır:

"Yanvar ayı üzrə aparılan sayım zamanı sifariş olunaraq istifadə edilmiş məhsullarla faktiki qalıq arasında nəzərəçarpacaq və kütləvi uyğunsuzluqlar aşkar edilmişdir. Məsələ ilə bağlı ona müraciət etdikdə, yeməkləri özünə məxsus standart çərçivəsində hazırladığını bildirmişdir. Lakin mətbəx üzrə sərfiyyat göstəriciləri düzgün şəkildə sənədləşdirilməmiş, qeydlər qarışıq aparılmışdır ki, bu da hesabatların dəqiq çıxarılmasını çətinləşdirmişdir.

Bununla yanaşı, nəzərə alınmamışdır ki, bir ay ərzində istifadə olunan məhsul miqdarı ilə ay sonu qalıqları müqayisə etməklə təxmini aylıq sərfiyyatı müəyyənləşdirmək mümkündür. Catering sistemində çalışan hər bir aşpaza məlumdur ki, ona təqdim olunan normativlərdən kənara çıxmaq qayda pozuntusu hesab olunur.

Təbriz bəyə norma pozuntuları ətraflı şəkildə izah edilsə də, o, aşpaz kimi baş ofisin tövsiyə və göstərişlərini nəzərə almamış, öz yanaşmasını tətbiq etməyə davam etmişdir. Bu hal artıq ikinci dəfə idi ki, sayım zamanı məhsullar üzrə kütləvi itkilərlə müşahidə olunurdu.

Yaranmış vəziyyət bizi daha ciddi addımlar atmağa vadar etmiş və daxili araşdırmaya başlamaq qərarı verilmişdir. Vəziyyətdən məlumatlı olan Təbriz bəy isə araşdırmanın nəticəsində məsuliyyət məsələsinin gündəmə gələ biləcəyini nəzərə alaraq, özünü haqsızlığa məruz qalmış şəxs kimi təqdim etməyə çalışmış və media qurumu kimi sizə müraciət etməyi üstün tutmuşdur.

Bu kimi hallara müəssisəmiz tərəfindən yol verilməsi arzuolunan deyil. Bu günə qədər heç bir nümayəndəyə qarşı hörmətsizlik edilmədiyi kimi, bundan sonra da şirkət olaraq belə bir niyyətimiz yoxdur".

Qeyd edək ki, Təbriz İsmayılovla "Aspendos Catering" MMC-nin nümayəndələri məsələ ilə bağlı dəfələrlə əlaqə saxlayıblar. Şəxs MMC-yə son müraciəti zamanı qısa müddət ərzində kompensasiyasının ödənilməyəcəyi təqdirdə, şirkəti media orqanlarında və digər platformalarda cəmiyyət üçün zərərli qurum kimi təqdim edəcəyini və bununla da şirkətin imicinə zərər vuracağını açıq şəkildə ifadə edib:

"'"Aspendos Catering" MMC məsələnin hüquqi müstəvidə davam etdiriləcəyini bildirir. Bundan sonrakı mərhələdə şər və böhtan xarakterli məlumatların yayılması, işgüzar nüfuza xələl gətirilməsi, təqdim olunmuş vəzifə səlahiyyətlərindən mümkün sui-istifadə və işə qeyri-ciddi yanaşma halları üzrə məsələnin hüquq-mühafizə orqanlarına təqdim olunması nəzərdə tutulur".

Telegramda izləyin