"Güclü siyasi iradə və beynəlxalq dəstək olduğu təqdirdə, ən mürəkkəb münaqişələr belə sülh yolu ilə həll edilə bilər" - DEPUTAT

"Prezident İlham Əliyevin 2026-cı il fevralın 4-də Əbu-Dabidə "Zayed İnsan Qardaşlığı Mükafatı"nın təqdimolunma mərasimində səsləndirdiyi fikirlər müasir beynəlxalq münasibətlərdə sülhün real mexanizmlərini əks etdirən mühüm siyasi mesajlar kimi qiymətləndirilir", - bunu Sonxeber.az -a açıqlama verən deputat Şahin Seyidzadə deyib:

"Bu çıxış yalnız təşəkkür xarakteri daşımamış, eyni zamanda Azərbaycan-Ermənistan sülh modelinin beynəlxalq ictimaiyyətə təqdimatı olmuşdur. Dövlət başçısı qeyd etmişdir ki, Şeyx Zayedin adını daşıyan bu mükafat insanlıq, mərhəmət və qarşılıqlı hörmət prinsiplərinə əsaslanır. Şeyx Zayedin yaratdığı siyasi məktəb bu gün Birləşmiş Ərəb Əmirliklərini sabitlik, inkişaf və tolerantlıq məkanına çevirmişdir. Prezident İlham Əliyev bu siyasi irsin Şeyx Məhəmməd tərəfindən uğurla davam etdirildiyini vurğulamışdır. Birləşmiş Ərəb Əmirliklərinin inkişaf modeli, müasir dövlət idarəçiliyində uğurlu nümunə kimi təqdim edilmişdir. Bu model sülhün yalnız siyasi razılaşma deyil, cəmiyyətlərarası etimad üzərində qurulduğunu sübut edir. Prezident İlham Əliyev çıxışında dinlərarası və mədəniyyətlərarası dialoqun əhəmiyyətinə xüsusi yer ayırmışdır. Əl-Əzhərin böyük imamı və Roma Papasının sülh çağırışları beynəlxalq ictimaiyyətin Azərbaycan-Ermənistan münasibətlərində yeni mərhələyə verdiyi dəstəyin göstəricisi kimi dəyərləndirilmişdir. Dövlət başçısı xatırlatmışdır ki, Azərbaycan 30 ildən artıq müddətdə müharibənin ağır nəticələri ilə üzləşmişdir. Lakin hazırda artıq altı aydır ki, regionda sülh şəraiti hökm sürür. Bu dövr sülh mədəniyyətinin formalaşması baxımından mühüm mərhələdir. Vaşinqton Zirvə Görüşü sonrası əldə olunan nəticələr çıxışda xüsusi vurğulanmışdır. Prezident İlham Əliyev ABŞ Prezidenti Donald Trampın vasitəçilik rolunu yüksək qiymətləndirmiş, 2025-ci il avqustun 8-də imzalanmış sənədlərin tarixi əhəmiyyətini qeyd etmişdir. Həmin sənədlər regionda uzun illər davam edən qanlı münaqişəyə son qoymuşdur. Sülhün real nəticələri artıq praktik müstəvidə özünü göstərməkdədir. Nəqliyyat və ticarət məhdudiyyətlərinin aradan qaldırılması, enerji məhsullarının ixracı və iqtisadi əməkdaşlıq tərəflər arasında qarşılıqlı asılılıq mühitini gücləndirir. Bu, sülhün davamlılığını təmin edən əsas amillərdəndir. Prezident İlham Əliyevin fikrincə, Azərbaycan-Ermənistan sülh modeli beynəlxalq münaqişələrin həlli üçün örnək ola bilər. Güclü siyasi iradə, real addımlar və beynəlxalq dəstək olduğu təqdirdə, ən mürəkkəb münaqişələr belə sülh yolu ilə həll edilə bilər. Əbu-Dabidə keçirilən mərasim xüsusi simvolik məna daşıyır. Çünki yekun razılaşmaya aparan son danışıqlar məhz burada baş tutmuş, daha sonra Vaşinqtonda rəsmiləşdirilmişdir. Bu fakt bir daha göstərir ki, sülh təsadüf deyil, planlı və ardıcıl siyasətin nəticəsidir. Nəticə etibarilə, Prezident İlham Əliyevin bu çıxışı Azərbaycanın regional deyil, qlobal miqyasda sülh quruculuğuna verdiyi töhfənin beynəlxalq səviyyədə tanınmasının bariz nümunəsidir".

Telegramda izləyin