"Ölkəmiz artıq münaqişə tərəfi deyil, regionun iqtisadiyyatını, tranzit xəritəsini və sülh gündəmini diktə edən əsas mərkəzdir" - AÇIQLAMA

Azərbaycan bir çox ölkənin enerji təhlükəsizliyində mühüm rol oynayır.

Bunu Azərbaycan Prezidenti İlham Əliyev fevralın 9-da ABŞ Ticarət Palatasının beynəlxalq üzvlərlə əlaqələr, Yaxın Şərq və Türkiyə üzrə baş vitse-prezidenti Kuş Çoksinin başçılıq etdiyi nümayəndə heyətini qəbul edərkən bildirib.

Dövlət başçısı deyib ki, onlardan 10-u Avropa İttifaqının üzvü, 11-i isə eyni zamanda NATO-nun üzvüdür:

"Həmin ölkələr üçün hazırda Azərbaycan heç zaman görünmədiyi qədər daha mühüm tərəfdaşa çevrilir. Biz bütün öhdəliklərimizi yerinə yetiririk və siyasi gündəliyi heç zaman biznes ilə qarışdırmırıq və bu, bizim üçün qlobal enerji bazarında beynəlxalq fəaliyyətimizi genişləndirmək üçün yaxşı fürsətdir. Artıq müzakirə etdiyimiz daşımalar layihələri region üçün böyük imkanlar yaradır. Çünki biz 30 il ərzində Ermənistanın təcavüzünə və işğalına məruz qalma faktına baxmayaraq, Azərbaycan məhz ərazilərinin azad olunması, güc və siyasət vasitəsilə ərazi bütövlüyümüzü və suverenliyimizi tam bərpa etdikdən sonra birinci addım atdı və 2025-ci il avqustun 8-də Prezident Trampın köməyi ilə sülh quruldu".

İlham Əliyev Azərbaycanın Ermənistana bütün tranzit yüklərə məhdudiyyətləri aradan qaldırdığını da söyləyib:

"Hazırda biz Ermənistana bütün tranzit yüklərə məhdudiyyətləri aradan qaldırmışıq. Çünki Ermənistanın etibarlı daşımalar, əlaqə marşrutları yoxdur və beləliklə, Azərbaycan tranziti onlar üçün çox əhəmiyyətlidir. Biz əməkdaşlığın ilk elementlərini qurmaq üçün Ermənistana neft məhsullarını təchiz etməyə başladıq

"Prezident İlham Əliyevin ABŞ Ticarət Palatasının nümayəndə heyəti ilə görüşü zamanı səsləndirdiyi bəyanatlar, Azərbaycanın sadəcə regional güc deyil, artıq qlobal strateji tərəfdaş və Cənubi Qafqazın iqtisadi memarı statusunu rəsmən möhürləyir", - bunu Sonxeber.az -a açıqlama verən politoloq Tural İsmayılov deyib:

"Dövlət başçısının 10 Avropa İttifaqı və 11 NATO üzvü olan ölkənin enerji təhlükəsizliyində Azərbaycanın oynadığı rolu xüsusi vurğulaması, Bakının Qərbin kollektiv təhlükəsizlik sistemindəki "vazkeçilməz dayaq" mövqeyini rəqəmlərlə ifadə edən güclü bir mesajdır. Bu, həm də o deməkdir ki, Azərbaycanın sabitliyi və suverenliyi artıq birbaşa olaraq Qərbin ən mühüm paytaxtlarının enerji və iqtisadi maraqları ilə kəsişir. Siyasətin biznes maraqları ilə qarışdırılmaması prinsipi isə qlobal investisiya dairələri üçün ən böyük "etimad xartiyası"dır; dünyada enerjinin siyasi təzyiq alətinə çevrildiyi bir dövrdə Bakı öz etibarlı tərəfdaş imicini "qızıl standart" səviyyəsinə qaldırır.

2025-ci ilin avqustunda Prezident Trampın dəstəyi ilə əldə olunmuş sülhün Azərbaycan tərəfindən məhz ərazi bütövlüyünün tam bərpası və hərbi-siyasi güc amili ilə sığortalanması, bölgədəki yeni reallığın "dayanıqlı sülh" modelinə keçdiyini göstərir. Ermənistana qarşı tətbiq edilən bütün tranzit məhdudiyyətlərinin aradan qaldırılması və ən əsası, İrəvana neft məhsullarının təchiz edilməsinə başlanılması isə Azərbaycanın nümayiş etdirdiyi "qalib dövlət alicənablığı"nın və strateji uzaqgörənliyinin zirvəsidir. Bu addımlarla Bakı Ermənistanı illərdir boğulduğu logistik və iqtisadi izolyasiyadan çıxararaq, onu birbaşa öz iqtisadi orbitinə cəlb edir. Bu, sadəcə humanist bir jest deyil, Ermənistanın gələcək taleyini və rifahını Azərbaycanın yaratdığı kommunikasiya xətlərinə bağlayan dərin bir geoiqtisadi gedişdir.

Nəticə etibarilə, bu bəyanatlar Azərbaycanın "orta güc" doktrinasının praktiki tətbiqidir. Ölkəmiz artıq münaqişə tərəfi deyil, regionun iqtisadiyyatını, tranzit xəritəsini və sülh gündəmini diktə edən əsas mərkəzdir. ABŞ biznes dairələrinin bu reallığı yerində görməsi və dövlət başçısının Ermənistanın iqtisadi reabilitasiyası üçün yaşıl işıq yandırması, Cənubi Qafqazda "silahların susduğu, ticarətin danışdığı" yeni bir eranın - Azərbaycan erasının başlandığını bəyan edir".

Telegramda izləyin