"Qafqazda sülh artıq sadəcə siyasi bəyanatlarda deyil, insanların və ideyaların sərhədlərdən maneəsiz keçidində yaşayır" - AÇIQLAMA

Ermənistanda "Sülh Körpüsü" Təşəbbüsü çərçivəsində fevralın 13-14-də ikitərəfli dəyirmi masa keçiriləcək.

Sonxeber.az xəbər verir ki, dəyirmi masada Ermənistan və Azərbaycanın vətəndaş cəmiyyətlərinin nümayəndələri görüşəcək.

Qeyd olunub ki, Azərbaycan nümayəndə heyəti bütün zəruri prosedurlardan keçərək delimatasiya və demarkasiya olunmuş quru sərhəd sahəsindən Ermənistana gedib.

"Sülh körpüsü" təşəbbüsünün əsas iştirakçıları ilə yanaşı, bu dəyirmi masada hər iki tərəfdən daha geniş iştirakçı qrupu iştirak edəcək.

"Fevralın 13-14-də Ermənistanda "Sülh Körpüsü" təşəbbüsü çərçivəsində keçirilən ikitərəfli dəyirmi masa Cənubi Qafqazın hərbi-siyasi gərginlik dövründən institusional sülh və birgəyaşayış mərhələsinə keçidinin ən mühüm siyasi göstəricilərindən biridir", - bunu Sonxeber.az -a açıqlama verən politoloq Tural İsmayılov deyib:

"Bu hadisənin ən fundamental və strateji əhəmiyyət kəsb edən tərəfi Azərbaycan nümayəndə heyətinin bütün zəruri prosedurlardan keçərək məhz delimatasiya və demarkasiya olunmuş quru sərhəd sahəsindən Ermənistana daxil olmasıdır. Bu fakt delimitasiya prosesinin sadəcə texniki bir iş deyil, eyni zamanda iki dövlət arasında qarşılıqlı suverenliyin tanınmasının və sərhədin bir "divar"dan "körpü"yə çevrilməsinin praktiki təzahürüdür. Vətəndaş cəmiyyəti institutlarının bu formatda təmsil olunması rəsmi sülh gündəminin ictimai rəydə legitimliyini artırır və "ikinci kanal diplomatiyası"nın (Track II diplomacy) regiondakı effektivliyini nümayiş etdirir.

Azərbaycan tərəfindən aralarında Fərhad Məmmədov, Rusif Hüseynov və Zaur Şiriyev kimi nüfuzlu beyin mərkəzlərinin rəhbərlərinin, habelə Ramil İsgəndərli, Könül Bədəlova və İlyas Hüseynov kimi tanınmış ekspertlərin yer aldığı 19 nəfərlik heyətin iştirakı, rəsmi Bakının sülh prosesinə intellektual və ekspert səviyyəsində nə dərəcədə ciddi önəm verdiyini göstərir. Bu heyət tərkibi həm iqtisadi-tranzit (Rauf Ağəmirzəyev), həm hüquqi, həm də sosial aspektləri əhatə edərək Ermənistan tərəfinin 20 nümayəndəsi ilə bərabərhüquqlu və genişmiqyaslı müzakirə platforması yaradır. Bu dəyirmi masa illərdir davam edən informasiya blokadasının və psixoloji baryerlərin qırılması üçün unikal fürsətdir; nümayəndə heyətlərinin quru sərhədi vasitəsilə bir-birinin ölkəsinə keçməsi regionda "normallaşma" prosesinin artıq geridönməz bir xarakter aldığının rəsmi mesajıdır. 2026-cı ilin bu mühüm fevral görüşü sübut edir ki, Cənubi Qafqazda sülh artıq sadəcə siyasi bəyanatlarda deyil, həm də insanların və ideyaların sərhədlərdən maneəsiz keçidində yaşayır".

Telegramda izləyin