Azərbaycan və Fransa arasında münasibətlərin gərginləşməsinin əsas səbəbkarı məhz Fransa olub

Fevralın 13-15-də 62-ci Münhen Təhlükəsizlik Konfransında iştirak edən Azərbaycan Respublikasının Prezidenti İlham Əliyev tədbir ərəfəsində bir sira rəsmi görüşlər keçirib, Azərbaycan telekanallarına və "France 24" telekanalına müsahibə verib.
Müsahibədə hazırda Fransa ilə ölkəmiz arasında münasibətlərə geniş yer ayrılıb. Ölkə başçısı Fransa ilə hazırki münasıbətlərə gəlincə qeyd edib ki, İkinci Qarabağ müharibəsindən əvvəl Azərbaycanın Fransa ilə çox yaxşı münasibətləri var idi. Həmin illərdə Prezidentlər Sarkozi və Olland ölkəmizə səfərlər edib, Prezident İlham Əliyevin Fransaya rəsmi səfərləri həyata keçirilib. Emmanuel Makronun Prezidentliyi dövründə də İlham Əliyevin Fransaya səfəri baş tutub. iki ölkənin şirkətləri arasında biznes əlaqələri mövcud olub.
Təəssüflər olsun ki, İkinci Qarabağ müharibəsi zamanı Fransa hökuməti separatçı qurum və işğalçı Ermənistanın tərəfini tutdular. Milli Assambleya və Senat separatçılara dəstək məqsədilə 10-dan artıq qətnamə qəbul edib və Ermənistanın özü tanımasa belə, Fransa parlamenti hətta qondarma "Dağlıq Qarabağ"ı tanıyıb. Beləliklə, Azərbaycan və Fransa arasında münasibətlərin gərginləşməsinin əsas səbəbkarı məhz Fransa olub.
Burada Fransa Prezidentinin və bir çox fransız rəsmilərinin, o cümlədən Fransa Senatının sədrinin, Milli Assambleyanın sədrinin, tanınan şəxslərin Azərbaycan və onun Prezidentinə təhqirlər yağdırmasını yada salmaq lazımdır. Bundan əlavə, 2020-ci ildə İkinci Qarabağ müharibəsindən sonra və 2023-cü ildə antiterror əməliyyatından əvvəl xanım Pekres, cənab Barnye, cənab Retayyo kimi çox tanınan şəxslər Qarabağa qeyri-qanuni səfərlər edərək separatçılara dəstək vermişlər. Bu, Azərbaycan dövlətçiliyinə açıq təhqir və tam hörmətsizlik əlaməti kimi qiymətləndirilib.
Prezident İlham Əliyev Bakıda keçirilən hərbi məhkəmənin Qarabağ bölgəsinin 13 şəxs barədə çıxardığı ağır həbs cəzaları, o cümlədən keçmiş liderinə ömürlük həbs cəzası verməsinə dair qərarı ilə bağlı suala cavabında onların Azərbaycan ərazisində, Ermənistan da daxil olmaqla bütün beynəlxalq ictimaiyyət tərəfindən tanınan suveren Azərbaycan dövlətinin ərazisində qanunsuz fəaliyyət göstərən separatçı rejimin liderləri olduğunu bildirib. "Bu insanlar uzun illər ərzində azərbaycanlılara və Azərbaycana qarşı törədilən bütün müharibə cinayətlərinin təşkilatçıları olublar və məsuliyyətə cəlb ediliblər. Onlar bizim həyata keçirdiyimiz hərbi əməliyyat nəticəsində Qarabağda saxlanılıb məsuliyyətə cəlb olunublar. Onlar vəkillərlə təmin ediliblər. Məhkəmə prosesi tamamilə şəffaf keçib. Onların cinayətləri şahid ifadələri, çoxsaylı ifadələrlə sübuta yetirilib, hər hansı qanun pozuntusundan söhbət gedə bilməz", - deyə dövlətimizin başçısı əlavə edib.
Prezident İlham Əliyev ötən ilin sonunda Fransa Prezidenti Makron ilə görüşdüyünü, qörüşün çox müsbət keçdiyini, hər şeyi yenidən başlamaq barədə razılığa gəlindiyini və ölkəmizin buna hazır olduğunu bildirib. Dövlətimizin başçısı vurğulayıb ki, bizə hər hansı ölkə, o cümlədən Fransa ilə heç bir problem lazım deyil.

Həcər Verdiyeva - Tarix elmləri doktoru, professor

Telegramda izləyin