"Azərbaycançılıq ideyası milli-mənəvi dəyərlər üzərində möhkəmlənir" - DEPUTAT

"Bu gün hər bir millətin ayaqda qalmasını təmin edən bir neçə mühüm komponent mövcuddur. Onlardan ən vaciblərindən biri milli və mənəvi dəyərlərdir. Azərbaycançılıq ideyası da məhz bu dəyərlər üzərində formalaşıb və xalqımızın mənəvi bütövlüyünü təmin edən əsas ideoloji sütunlardan biridir".

Bu sözləri Sonxeber.az-a Milli Məclisin deputatı Ceyhun Məmmədov danışıb.

O, açıqlamasında qeyd edib ki, hazırda ölkəmizdə dövlət tərəfindən milli-mənəvi dəyərlərin qorunması, tarixi ənənələrimizin yaşadılması və gələcək nəsillərə ötürülməsi istiqamətində ardıcıl və sistemli addımlar atılır:

"Hesab edirəm ki, biz şanslı və xoşbəxt bir millətik. Çünki zəngin tarixi köklərə, güclü milli dəyərlərə və möhkəm ənənələrə sahibik. Məhz bu dəyərləri qorumaqla yanaşı, onları müasir dövrün tələblərinə uyğun şəkildə inkişaf etdirmək imkanlarımız da kifayət qədər genişdir.

Düşünürəm ki, bu proseslərin daha da irəli aparılması üçün qanunvericilik məsələlərinə xüsusi diqqət yetirilməlidir. Azərbaycanda milli-mənəvi dəyərlərin qorunması və təbliği ilə bağlı vahid və məqsədyönlü dövlət proqramının qəbul olunmasına ehtiyac var. Bununla paralel olaraq, cəmiyyət daxilində, xüsusilə də gənclər arasında davamlı maarifləndirmə və təbliğat işləri aparılmalıdır. Yalnız bu yolla gənc nəsli milli kimliyimizə bağlı şəkildə formalaşdırmaq, onları yad təsirlərdən qorumaq və azərbaycançılıq ideyasını daha da gücləndirmək mümkündür".

Vüsalə İbrahimli

P.S. Yazı Azərbaycan Respublikası Medianın İnkişafı Agentliyinin maliyyə dəstəyi ilə "Azərbaycançılıq ideyasının təbliği" mövzusuna uyğun olaraq dərc edilir.

Telegramda izləyin