Abituryentlərin imtahan qorxusunu azaltmağın hansı üsulları var? - AÇIQLAMA

Abituriyentlik dövrü gənclər üçün həyatda böyük bir mərhələni simvolizə edir. Bu dövrdə yalnız bilik yox, həm də emosional dözümlülük, stres idarəsi və qərarvermə qabiliyyəti sınanır.

Buna görə də imtahan qorxusu, yəni test və qiymətləndirmə qarşısında yaranan narahatlıq, çoxsaylı gənclərin təcrübə etdiyi normal, lakin idarə olunmaz hal kimi ortaya çıxır.

Bəs görəsən abituryentlərin imtahan qorxusunu azaltmağın hansı üsulları var?

Psixoloq G.Qədirli bu barədə Sonxeber.az -a açıqlama verib:

"Imtahan qorxusunu azaltmaq üçün bir neçə effektiv yol var. Planlı və sistemli hazırlıq gəncin özünə inamını artırır, qeyri-müəyyənliyi azaldır. Stress idarəsi texnikaları - nəfəs məşqləri, vizuallaşdırma və qısa meditasiya - bədən və zehni sakitləşdirərək panik hissinin qarşısını alır. Müsbət mənada öz-özünə dialoq, yəni, "mən bacaracağam" və ya "bu sadəcə bir mərhələdir" kimi düşüncələr qorxunun təsirini zəiflədir.

Eyni zamanda valideynlərin və müəllimlərin dəstəyi, gəncin emosional vəziyyətinə diqqət göstərməsi vacibdir. Təzyiq yerinə təşviq və motivasiya vermək, uğursuzluq qorxusunu azaltmağa kömək edir. Sosial müqayisədən uzaq durmaq, yalnız öz inkişafına fokuslanmaq da abituriyentin gərginliyini yüngülləşdirir.

Nəticədə imtahan qorxusu tamamilə aradan qaldırıla bilməsə də, düzgün yanaşma və psixoloji hazırlıq sayəsində idarə oluna bilir, gənclər həm akademik, həm də emosional baxımdan daha güclü vəziyyətə gəlir".

Telegramda izləyin