Dörd gün, üç gecə fasiləsiz şəkildə onlayn oyun oynayan universitet tələbəsi beyin qanaması keçirərək həyatını itirib

Tayvanda dörd gün üç gecə fasiləsiz şəkildə onlayn oyun oynayan universitet tələbəsi beyin qanaması keçirərək həyatını itirib.

Sonxeber.az xarici mediaya istinadən xəbər verir ki, 20 yaşlı gənc qış tətili müddətində kompüter qarşısında uzun saatlar keçirib və demək olar ki, ümumiyyətlə yatmayıb. Ailəsinin istirahət etməsi ilə bağlı dəfələrlə etdiyi xəbərdarlıqlara məhəl qoymayan tələbənin dörd gün ərzində qidalanma və digər əsas ehtiyaclarını da ciddi şəkildə ihmal etdiyi bildirilir.

Məlumata əsasən, gecə saatlarında beynindəki atardamarlardan birinin yırtılması nəticəsində ağır beyin qanaması baş verib və gəncin həyatını xilas etmək mümkün olmayıb.

Hadisədən sonra nevroloqlar uzunmüddətli yuxusuzluğun orqanizm üçün ciddi təhlükə yaratdığını vurğulayıblar. Mütəxəssislərin sözlərinə görə, davamlı yuxusuzluq arterial təzyiqi kəskin şəkildə yüksəldə, damar divarlarının zəifləməsinə və yırtılmasına səbəb ola bilər. Xüsusilə genetik meyilliyi olan şəxslərdə insult və beyin qanaması riski bir neçə dəfə artır.

Qeyd edək ki, Tayvanda əvvəlki illərdə də internet kafelərdə günlərlə fasiləsiz oyun oynayan gənclərin qəfil ölümü ilə bağlı oxşar hadisələr zaman-zaman ictimaiyyətin diqqət mərkəzinə düşüb. Hadisə yenidən rəqəmsal asılılıq və sağlam həyat tərzi ilə bağlı müzakirələri aktuallaşdırıb.

Telegramda izləyin