"Ət House"un qəssabından 35 min manatlıq dələduzluq - "Penitensiar Xidmətə 1 ton ət verəcəyik..."

Bakıda fəaliyyət göstərən "Ət House" mağazasının qəssabı dələduzluğa görə həbs edilib.

Qaynarinfo-nun əldə etdiyi məlumata görə, Ruslan adlı qəssab dələduzluq yolu ilə Rövşən adlı şəxsi 35 500 manat pulunu mənimsəyib.

Rövşən Ruslanın müştərisi olub. O, hər dəfə "Ər House" mağazasından ət aldıqda Ruslan ona bu sahədə biznes təklif edib. Rövşən əvvəlcə qəssabın təklifinə əhəmiyyət verməsə də, sonradan ət biznesinə başlamağa qərar verib.

Ruslan Rövşəndən birinci dəfə 1500 manat alıb. Ona bildirib ki, Qurban bayramı ilə əlaqədar harasa 100 kiloqram verəcəklər, pul da buna görə lazımdır.
Rövşən də razılaşaraq deyilən məbləği ona verib. Ruslan həmin pulu qumarda uduzub.

Daha sonra Ruslan Rövşənə bildirib ki, qohumları Penitensiar Xidmətinə işə düzəlib. O, Rövşəni inandırıb ki, hər ay sözügedən quruma 1 ton ət veriləcək, buna görə də pul lazımdır. Rövşən bu dəfə də Ruslana inanıb və deyilən məbləği verib. Bu minvalla Ruslan Rövşəndən hissə-hissə olmaqla 35 500 manat pul alıb. Həmin pulları isə qumarda uduzub.

Zərəçəkmiş hüquq-mühafizə orqanlarına müraciət etdikdən sonra Ruslan saxlanılıb. Ona qarşı Cinayət Məcəlləsinin 178.2.4-cü maddəsi ilə ittiham irəli sürülüb. Həmçinin barəsində məhkəmənin qərarı ilə həbs qətimkan tədbiri seçilib.

Cinayət işinə Abşeron Rayon Məhkəməsində hakim Firuzə Kərimovanın sədrliyi ilə baxılıb.

Ruslan məhkəmədə verilmiş ittiham üzrə özünü təqsirli bilib. O, bildirib ki, Rövşəndən aldığı pulları qumarda uduzub. Əlavə edib ki, Rövşənə dəymiş zərərdən 5000 manat qaytarıb.

Məhkəmənin hökmü ilə Ruslan 2 il 4 ay müddətinə azadlıqdan məhrum edilib.

Telegramda izləyin