Məktəbin qarşısında həyat yoldaşını güllələyən kişinin ifadəsi şok etdi

İstanbulun Fatih rayonunda boşanma mərhələsində olduğu həyat yoldaşı Semiha Denizi məktəb qarşısında qətlə yetirən Emrah Denizin ifadəsi ortaya çıxıb.

Sonxeber.az xarici mediaya istinadən xəbər verir ki hadisə dünən günorta saatlarında baş verib. Məlumata görə, iki uşaq anası olan 33 yaşlı Semiha Deniz 14 yaşlı qızını məktəbdən götürmək üçün məktəbin qarşısına gəldiyi zaman hücuma məruz qalıb. Küçədə başından güllə yarası alan qadın ağır vəziyyətdə xəstəxanaya çatdırılsa da, həkimlərin səylərinə baxmayaraq həyatını xilas etmək mümkün olmayıb.

Araşdırma zamanı məlum olub ki, şübhəli Emrah Deniz barəsində daha əvvəl uzaqlaşdırma qərarı verilib. İddialara görə, o, hadisə günü Çağlayandakı məhkəmədən çıxdıqdan sonra atasının evinə gedərək qeydiyyatsız silah götürüb və həyat yoldaşının qızını götürməyə gəldiyi məktəbin qarşısında ona atəş açıb.

Hadisə şahidlərindən biri bildirib ki, motosikletlə gələn şəxs üç dəfə atəş açıb və güllələrdən biri qadının başına dəyib. Qadın yerə yıxıldıqdan sonra hücum edən şəxs motosikletlə hadisə yerindən uzaqlaşıb.

Polis tərəfindən saxlanılan Emrah Deniz ifadəsində ittihamları qəbul etmədiyini deyib. O bildirib: "Silahı qorxutmaq üçün başına tuşladım. Tətik mexanizminin hazır vəziyyətdə olduğunu unutmuşdum. İtələyərkən silah qəfil açıldı".

Telegramda izləyin