Atasının maşınını sürən yeniyetmə yolu bir-birinə qatdı - VİDEO

Türkiyənin Aksaray şəhərində 16 yaşlı yeniyetmənin polisə tabe olmayaraq maşınla qaçması şəhərdə film səhnələrini xatırladan gərgin təqibə səbəb olub.

Sonxeber.az türk mediasına istinadən xəbər verir ki, hadisə Taşpazan məhəlləsində, Ebulfeyz Elçibey küçəsində baş verib. Məlumata görə, Ö.F.K. adlı 16 yaşlı yeniyetmə atasına məxsus 68 KD 202 dövlət nömrə nişanlı lüks avtomobili götürərək dostu M.T. (16) ilə birlikdə şəhər mərkəzində gəzintiyə çıxıb. Bu zaman Aksaray İl Emniyet Müdürlüğü Trafik Şöbəsinin əməkdaşları avtomobildən şübhələnərək sürücünü saxlamaq istəyib. Lakin sürücü polisin "dayan" əmrinə tabe olmayaraq sürətlə uzaqlaşıb.

Polis əməkdaşları avtomobili təqib etməyə başlayıb. Megafonla edilən bütün xəbərdarlıqlara baxmayaraq, yeniyetmə qaçmağa davam edib. Təqib zamanı sürücü drift edərək, avtomobillər arasında təhlükəli manevrlər edib, qırmızı işıqda dayanmayıb və avtomobilin işıqlarını söndürərək iz itirməyə çalışıb. Polis anonsundan sonra şəhərin bəzi yolları bağlanaraq avtomobilin qarşısı kəsilməyə çalışılıb.

Təxminən 15 dəqiqə davam edən təqib Aksaray-Ankara Karayolu Nevşehir Kavşağı istiqamətində polis əməkdaşlarının yolu bağlaması ilə başa çatıb. Avtomobil saxlanılıb və sürücü Ö.F.K. ilə yanaşı avtomobildə olan dostu da maşından endirilib. Hər iki yeniyetmə saxlanılaraq tibbi müayinə üçün Aksaray Eğitim ve Araştırma Hastanesi xəstəxanasına aparılıb.

Polis bölməsində ifadələri alınan yeniyetmə sürücüyə "polisin dayan əmrinə tabe olmamaq, təhlükəli manevr etmək, qırmızı işıq qaydasını pozmaq, sürücülük vəsiqəsi olmadan avtomobil idarə etmək və drift etmək" kimi qayda pozuntularına görə ümumilikdə 381 min lirə məbləğində inzibati cərimə tətbiq olunub.

Bundan əlavə, hadisə ilə bağlı Aksaray Cumhuriyet Başsavcılığı tərəfindən cinayət işi üzrə araşdırma başladılıb. Yeniyetmənin idarə etdiyi atasına məxsus lüks avtomobil isə 4 ay müddətinə yol istifadəsindən kənarlaşdırılaraq cərimə meydançasına aparılıb.

Telegramda izləyin