İmtahanda hüquqları pozulan abituriyent və tələbələr nə etməlidirlər? - AÇIQLAMA

İmtahanlarda hüquqi pozuntular abituriyentlər və tələbələr üçün ciddi narahatlıq doğura bilər.

Bu hallar həm ədalətli qiymətləndirmə prinsipinə, həm də tələbələrin gələcək akademik və peşəkar imkanlarına birbaşa təsir göstərir.

Bəs görəsən imtahanda hüquqları pozulan abituriyent və tələbələr nə etməlidirlər?

Hüquqşünas Xanım Yusifova bu barədə Sonxeber.az -a açıqlama verib:

"Belə vəziyyətlərdə qanunvericilik çərçivəsində müəyyən hüquqi müdafiə yolları mövcuddur. Azərbaycan qanunvericiliyinə görə, imtahanlarda hüquqi pozuntular baş verdikdə abituriyent və ya tələbələr bir-neçə hüquqi addımları ata bilərlər:

İmtahanı keçirən qurumla rəsmi müraciət: Əvvəlcə abituriyentlər və tələbələr imtahanı təşkil edən Təhsil Nazirliyi, Dövlət İmtahan Mərkəzi (DİM) və ya universitetin imtahan komissiyasına rəsmi yazılı şikayət təqdim edə bilərlər. Bu müraciətdə pozuntunun ətraflı təsviri, şahidlərin məlumatları və varsa sübutlar qeyd edilməlidir.

Apellyasiya proseduru: DİM və universitetlər imtahan nəticələrinə etiraz üçün apellyasiya mexanizmi təqdim edir. Bu prosedur vasitəsilə qiymətləndirmə zamanı ədalətsizlik və ya texniki pozuntuların araşdırılması tələb oluna bilər.

Hüquqi şikayət və məhkəməyə müraciət: Əgər daxili apellyasiya proseduru nəticəsiz qalarsa, vətəndaşlar məhkəməyə müraciət edərək imtahan nəticələrinin ləğvi və ya yenidən qiymətləndirmə tələb edə bilərlər. Bu halda Azərbaycan Respublikasının "İnzibati prosedur haqqında" və "Təhsil haqqında" qanunları tətbiq olunur. Məhkəmədə müraciət edən şəxs pozuntunun imtahanın keçirilmə qaydalarına və təhsil proqramına uyğun olmadığını sübut etməlidir.

İmtahanlarda hüquqi pozuntuların qarşısını almaq üçün abituriyent və tələbələr hadisələri vaxtında sənədləşdirməli, rəsmi şikayət prosedurlarını izləməli və zəruri hallarda məhkəməyə müraciət etməlidirlər. Qanunvericilik tələbələrin ədalətli qiymətləndirilməsini təmin edir və hər bir şikayətçinin hüquqlarını qoruyur".

Telegramda izləyin