Qol sevinci təhlükəli anlara çevrildi: Azarkeş havaya atəş açdı - VİDEO VİDEO

Fənərbaxça klubunun Samsunspor üzərində son saniyələrdə qazandığı qələbə Türkiyədə maraqlı və mübahisəli görüntülərlə yadda qalıb. Qarşılaşmanın son dəqiqələrində vurulan qol Rize şəhərində qeyri-adi sevinc anlarına səbəb olub.

Sonxeber.az türk mediasına istinadən xəbər verir ki, məlumata görə, "sarı-lacivərdlilər"in 90+5-ci dəqiqədə vurduğu qoldan sonra bir nəfər sevincini silahla havaya atəş açaraq qeyd edib. Həmin anlar ətrafda olan şəxslər tərəfindən mobil telefonla lentə alınıb.

Yayılan görüntülərdə bir vətəndaşın televiziya qarşısında oyunu izlədikdən sonra qol anında silah götürərək ardıcıl şəkildə havaya atəş açdığı görünür. Video qısa müddətdə sosial şəbəkələrdə yayılaraq geniş müzakirələrə səbəb olub.

Bir çox sosial şəbəkə istifadəçisi bu cür "qələbə sevinci"nin təhlükəli olduğunu vurğulayaraq silahla edilən belə davranışların ciddi nəticələrə səbəb ola biləcəyini qeyd edib. Hadisə ilə bağlı rəsmi qurumların hər hansı açıqlama verib-vermədiyi isə hələlik məlum deyil.

Telegramda izləyin