Qurban bayramına az qalmış heyvanları kökəltmək üçün görün hansı üsula əl atıblar

Türkiyənin Çorum şəhərində qurbanlıq iri buynuzlu heyvanların palçıq içində saxlanıldığı və hərəkətlərinin məhdudlaşdırılaraq kökəldildiyi görüntülər sosial şəbəkələrdə ciddi narazılığa səbəb olub.

Sonxeber.az xarici mediaya istinadən xəbər verir ki, Qurban Bayramına təxminən iki ay qalmış yayılan görüntülərdə bəzi iri buynuzlu heyvanların palçıq içində saxlanıldığı və hərəkətlərinin məhdudlaşdırılaraq daha tez çəki yığmalarının təmin edildiyi iddia olunub. Kadrlar sosial mediada geniş müzakirələrə səbəb olub.

Hadisə ilə bağlı Türkiyə Kənd Təsərrüfatı Nazirliyi açıqlama verib. Nazirliyin rəsmi sosial media hesabından yayılan açıqlamada heyvan rifahına zidd davranışların yer aldığı görüntülərlə bağlı dərhal araşdırmaya başlanıldığı qeyd edilib. Məlumata görə, görüntülərdəki təsərrüfatın Çorumda yerləşdiyi müəyyən edildikdən sonra vilayətin Kənd Təsərrüfatı və Meşəçilik İdarəsi tərəfindən müəssisədə yoxlamalar aparılıb.

Yoxlamaların nəticəsinə əsasən, qüvvədə olan qanunvericiliyə uyğun olaraq təsərrüfat sahibinə inzibati cərimə tətbiq edilib.

Açıqlamada həmçinin bildirilib ki, təsərrüfatdakı heyvanların sağlamlığı və rifahına mənfi təsir göstərən şəraitin aradan qaldırılması üçün lazımi tədbirlər görülüb. Heyvanların saxlanıldığı sahələr təmizlənərək onların uyğun şəraitdə saxlanılması üçün zəruri düzəlişlər edilib.

Nazirlik vurğulayıb ki, heyvanların sağlamlığı və rifahına qarşı hər hansı laqeydlik və ya pis rəftar qəbuledilməzdir və bu prinsipi pozan heç bir şəxs və ya müəssisəyə güzəşt edilməyəcək. Qurum ölkə üzrə heyvan rifahının qorunması istiqamətində nəzarət tədbirlərinin davam etdiriləcəyini bildirib.

Telegramda izləyin