"Emosional boşluq insanları "mistik həllərə" yönəldir" - AÇIQLAMA

Son dövrlərdə sosial şəbəkələrdə "rituala qoşul, iş tap", "bu enerjiyə daxil ol, ailə qur", "niyyət et, həyatın dəyişsin" kimi vədlərlə paylaşılan məzmunların sayı artıb. Xüsusilə şəxsi həyatında çıxış yolu axtaran, işsizlik, münasibət problemi və ya gələcəklə bağlı narahatlıq yaşayan insanların bu cür paylaşımlara daha çox maraq göstərdiyi müşahidə olunur. Psixoloji baxımdan bu marağı necə izah etmək olar? İnsanlar niyə belə vədlərə inanmağa meyllənir? Bu, daha çox ümidsizlik, çıxılmazlıq, emosional boşluq, yoxsa nəzarət hissini bərpa etmək istəyi ilə bağlıdır?

Mövzu ilə bağlı Sonxeber.az-a psixoloq Samirə Bağırova danışıb.

O, açıqlamasında qeyd edib ki, əvvəllər ruzi duası, ərə getmək duası, iş tapmaq duaları yazdırmaq üçün mollaların qapılarında sübh tezdən növbə yaranardı:

" Bu 40 ildə insanların düşüncə səviyyəsi dəyişibmi? Xeyr. "Vergi verilən" geydirmə mollaların bəziləri bu gün sertifikatlı şəxslərlə əvəz olunub. Bu sahə ilə məşğul olan insanları tək bir adla ifadə etmək də çətindir, çünki onların fərqli yanaşmaları və rolları var. Nə molla, nə ruhani, nə kouç, nə psixoloq, nə də Tibetdə təcrübə keçmiş layman, Sadhguru kimi "guru" deyillər. Bəs, insanlar nə üçün belə şəxslərə müraciət edir? Hansı səbəblər onları buna vadar edir?
Çıxılmazlıq hissi, emosional boşluq və mənəvi ehtiyac, təsdiq axtarışı - insanlar inanmaq istədikləri şeyləri təsdiqləyən nümunələr görmək istəyirlər. Mistik düşüncələrə meyl də ola bilər. İnsan təbiətcə görünməyən güclərə inanmağa meyllidir. Bu, min illər boyu formalaşmış bir xüsusiyyətdir. Taleyə, enerjilərə, gizli qanunlara inanmaq və bunları təbliğ etmək əslində dərin bilik tələb edir. Amma sosial şəbəkələr bu mövzuları, heç də dərin biliyə sahib olmayan insanlar tərəfindən sadələşdirərək kommersiyalaşdırıb".

Telegramda izləyin