"Münasibətdə sevgi olsa belə, əsas ehtiyaclar ödənmirsə, insan özünü tənha hiss etməyə başlayır" - AÇIQLAMA

Münasibətlərdə ən çox çaşdıran və insanı daxildən yoran hisslərdən biri də "sevirəm, amma xoşbəxt deyiləm" düşüncəsidir. Bir tərəfdən bağlılıq, xatirələr və emosional yaxınlıq var, digər tərəfdən isə narahatlıq, yorğunluq və daxili boşluq hissi...

Bu ziddiyyət bir çox insanın yaşadığı, amma izah etməkdə çətinlik çəkdiyi psixoloji vəziyyətdir.

Bəs görəsən nədir bunun səbəbi?

Psixoloq Gülsər Qədirli bu barədə Sonxeber.az -a açıqlama verib:

"Sevgi ilə uyğunluq eyni şey deyil. İnsan birini həqiqətən sevə bilər, amma dəyərlər, həyat tərzi, gözləntilər üst-üstə düşməyəndə münasibət insana rahatlıq yox, gərginlik gətirir.

Digər tərəfdən, emosional ehtiyacların qarşılanmaması bu hissi yaradır. Münasibətdə sevgi olsa belə, anlayış, diqqət, təhlükəsizlik hissi, dəstək kimi əsas ehtiyaclar ödənmirsə, insan özünü tənha hiss etməyə başlayır. Bu zaman sevgi kifayət etmir.

Çox vaxt bu vəziyyət uşaqlıqdan gələn psixoloji modellərlə də bağlı olur. İnsan şüuraltı olaraq tanış hisslərə məsələn, laqeydlik, qeyri-sabitlik və ya emosional məsafəyə çəkilir. Bu ona "normal" gəlir, amma eyni zamanda onu xoşbəxt etmir.

Bəzən isə insan sevgini öyrəşmək və ya bağlılıqla qarışdırır. Uzun müddət birlikdə olmaq, ayrılmaq qorxusu və ya tək qalmaq istəməmək "sevirəm" hissi kimi qəbul edilir. Halbuki bu, daha çox emosional asılılıq ola bilər.

Digər vacib məqam daxili konfliktlərdir. İnsan həm qalmaq istəyir, həm də getmək. Bu daxili mübarizə uzun müddət davam etdikdə psixoloji yorğunluq yaradır və xoşbəxtlik hissini zəiflədir.

"Sevirəm, amma xoşbəxt deyiləm" hissi o deməkdir ki, münasibətdə emosional balans pozulub. Sevgi təkbaşına kifayət etmir - sağlam münasibət üçün qarşılıqlı anlayış, hörmət, uyğunluq və emosional təhlükəsizlik də vacibdir. Bu hissi yaşayan insan üçün ən önəmli addım isə öz ehtiyaclarını dürüst şəkildə anlamaq və onları görməzlikdən gəlməməkdir".

Telegramda izləyin