"Universitetlərin regionlara köçürülməsi paytaxta yönəlmiş miqrasiyanın qarşısını ala bilər" - AÇIQLAMA

Bakıdakı ali təhsil müəssisələrinin paytaxtdan kənara köçürülməsi və bölgələrdə yeni universitetlərin yaradılması məsələsi artıq rəsmi sənədlərdə öz əksini tapıb.

Sonxeber.az xəbər verir ki, layihə hazırda müzakirə mərhələsindədir və müəyyən edilmiş illər üzrə konkret tədbirlər həyata keçiriləcək.

Bəs görəsən rayonların bölgələrə köçürülməsinin müsbət tərəfləri nələrdir?

Sosioloq Mətanət Məmmədova bu barədə Sonxeber.az -a açıqlama verib:

"Universitetlərin regionlara köçürülməsi bir sıra mühüm müsbət nəticələr vəd edir. Bu gün Bakıda ciddi sıxlıq müşahidə olunur: həm yaşamaq, həm də təhsil almaq üçün paytaxta axın davam edir. Cəmiyyətdə formalaşmış "yaxşı təhsil yalnız Bakıda mümkündür" düşüncəsi isə reallığı tam əks etdirmir. Əslində universitetin keyfiyyəti onun coğrafi yerləşməsindən deyil, təqdim etdiyi təhsil səviyyəsindən asılıdır.

Ali təhsil müəssisələrinin regionlara köçürülməsi paytaxta yönəlmiş miqrasiyanın qarşısını qismən ala, eyni zamanda bölgələrin sosial-iqtisadi inkişafını sürətləndirə bilər. Rayonlarda universitetlərin fəaliyyət göstərməsi yalnız təhsil sahəsinə deyil, ümumi həyat keyfiyyətinə də təsir edəcək. Bu, gənclər üçün yeni imkanların yaranması deməkdir: yaradıcılıq mərkəzləri, istirahət məkanları, sosial infrastruktur inkişaf edəcək, yaşayış binaları artacaq, yeni ticarət obyektləri və xidmət sahələri formalaşacaq.

Bununla yanaşı, regionlarda universitetlərin açılması yeni iş yerlərinin yaranmasına səbəb olacaq, yerli iqtisadiyyatı canlandıracaq və əhalinin paytaxta köçmək ehtiyacını azaldacaq. Nəticədə bölgələr daha balanslı şəkildə inkişaf edəcək.

Bu prosesin mənfi tərəflərinin ciddi şəkildə hiss olunacağını düşünmək çətindir. Çünki hər bir universitet, yerləşdiyi məkandan asılı olmayaraq, təhsilin əsas prinsiplərini qorumağa və keyfiyyətə nəzarəti təmin etməyə borcludur. Zaman keçdikcə gənclər arasında da yeni düşüncə formalaşacaq: keyfiyyətli təhsil üçün yalnız paytaxtı deyil, regionları da seçmək mümkündür.

Ümumilikdə, universitetlərin regionlara köçürülməsi gələcəyə hesablanmış, strateji baxımdan düzgün addım kimi qiymətləndirilə bilər. Hətta demək olar ki, bu təşəbbüs əhalinin kütləvi şəkildə Bakıya üz tutmasından daha əvvəl həyata keçirilməli idi"

Telegramda izləyin