Özünə inamsızlıq haradan yaranır və bu vəziyyətdən çıxmaq mümkündürmü? - AÇIQLAMA

Müasir dövrdə bir çox insanın daxili mübarizəsi gözlə görünməsə də, gündəlik həyatına ciddi təsir edir.

Xüsusilə özünə inamsızlıq hissi insanın qərar verməsinə, münasibətlərinə və ümumi həyat keyfiyyətinə mənfi təsir göstərir.

Bəs özünə inamsızlıq haradan yaranır və bu vəziyyətdən çıxmaq mümkündürmü?

Psixoloq Gülsər Qədirli bu barədə Sonxeber.az -a açıqlama verib:

"Özünə inamsızlıq adətən tək bir səbəbdən deyil, bir neçə psixoloji amilin birləşməsindən yaranır. Ən əsas səbəblərdən biri uşaqlıq dövründə formalaşan təcrübələrdir. Daim tənqid olunan, müqayisə edilən və ya kifayət qədər dəstək görməyən uşaqlarda "mən kifayət deyiləm" düşüncəsi formalaşır və bu inanc illər boyu davam edir.

Digər mühüm faktor uğursuzluq qorxusudur. İnsan səhv etməkdən çəkinəndə, özünü sınamaqdan qaçır və nəticədə öz potensialını görə bilmir. Bu da zamanla özünə olan inamı daha da zəiflədir. Sosial müqayisələr də bu prosesdə böyük rol oynayır. Xüsusilə sosial şəbəkələrdə başqalarının "ideal" həyatlarını görmək insanın özünü yetərsiz hiss etməsinə səbəb olur.

Özünə inamsızlığı aradan qaldırmaq üçün ilk addım onun fərqinə varmaqdır. İnsan hansı düşüncələrin onu geri saxladığını anlamalıdır. Daha sonra bu mənfi düşüncələri real faktlarla əvəz etmək vacibdir. Məsələn, "mən bacarmaram" əvəzinə "mən bunu öyrənə bilərəm" yanaşması formalaşdırılmalıdır.

Kiçik uğurların fərqinə varmaq və onları qiymətləndirmək də çox önəmlidir. İnsan özünü yalnız böyük nəticələrlə deyil, kiçik addımlarla da motivasiya etməlidir. Eyni zamanda, özünü başqaları ilə müqayisə etməkdən uzaq durmaq, hər kəsin həyat yolunun fərqli olduğunu qəbul etmək lazımdır.

Əgər özünə inamsızlıq gündəlik həyatı ciddi şəkildə məhdudlaşdırırsa, psixoloq dəstəyi almaq faydalı ola bilər. Çünki bu hissin kökündə çox vaxt dərin emosional səbəblər dayanır və onları təkbaşına həll etmək çətin olur".

Telegramda izləyin