Sosial mediada həddini aşanlar hansı maddə ilə cəzalandırılır? - AÇIQLAMA

Sosial şəbəkələrdə paylaşılan bəzi məzmunlar artıq ifadə azadlığının sərhədlərini aşaraq hüquqi məsuliyyət doğuran hallara çevrilir.

Təhqir, böhtan, şəxsi həyatın pozulması kimi hallar istifadəçiləri qanun qarşısında cavab vermək məcburiyyətində qoya bilər.

Bəs görəsən bu kimi davranışların hansı hüquqi maddələrlə tənzimlənir?

Vəkillər Kollegiyasının üzvü Rəşad Əliyev bu barədə Sonxeber.az -a açıqlama verib:

"İnternetdə və ya digər informasiya-telekommunikasiya şəbəkələrində ictimai mənəviyyatı təhqir edən, cəmiyyətə açıqca hörmətsizlik ifadə edən hərəkətlər - əxlaqsız ifadələrin səsləndirilməsi, belə məzmun təəssüratı yaradan jestlərin edilməsi, yaxud insan bədəninin hissələrinin əxlaq normalarına və milli-mənəvi dəyərlərə zidd formada nümayiş etdirilməsi - İnzibati Xətalar Məcəlləsinin 510-cu maddəsi ("Xırda xuliqanlıq", 2-ci hissə) ilə məsuliyyət yaradır. Bu əməllərə yol vermiş şəxslər 500-1 000 manat məbləğində cərimə olunacaq; işin hallarına görə və pozuntunu törədən şəxsin şəxsiyyəti nəzərə alınmaqla, bu tədbirlər kifayət etmədikdə, bir ayadək inzibati həbs tətbiq edilə bilər.

Eyni əməlin bir il ərzində təkrar törədilməsi halında cərimə 1 000-2 000 manat arasında olacaq; zəruri hallarda bir aydan iki ayadək inzibati həbs tətbiq edilə bilər.

Bundan əlavə, İXM-in 524.2-ci maddəsinə əsasən, internet resurslarında fahişəliklə məşğul olmağa açıq çağırışlar etmək və ya kütləvi nümayişlə fahişəliklə bağlı sövdələşmələrdə iştirak etmək 500 manat cərimə ilə nəticələnir".

Telegramda izləyin