Keyfiyyətsiz məhsul alan vətəndaş hansı hüquqlara malikdir? - AÇIQLAMA

Gündəlik alış-veriş zamanı vətəndaşların ən çox qarşılaşdığı problemlərdən biri də keyfiyyətsiz və ya qüsurlu məhsulların satılmasıdır.

Belə hallarda bir çox insan hansı hüquqlara malik olduğunu bilmədiyi üçün ya zərərə düşür, ya da hüququnu tələb etməkdən çəkinir.

Bəs görəsən keyfiyyətsiz məhsul alan vətəndaş hansı hüquqlara malikdir?

Hüquqşünas Xanım Yusifova bu barədə Sonxeber.az -a açqılama verib:

"Azərbaycan qanunvericiliyinə əsasən istehlakçıların hüquqları "İstehlakçıların hüquqlarının müdafiəsi haqqında" qanunla qorunur və keyfiyyətsiz məhsul alan vətəndaş bir sıra seçim hüquqlarına malikdir.

İlk növbədə, vətəndaş aldığı məhsul qüsurlu olduqda satıcıdan məhsulun dəyişdirilməsini tələb edə bilər. Əgər eyni məhsul mövcud deyilsə, alternativ məhsulla əvəz olunması da mümkündür.

İstehlakçı eyni zamanda məhsulun qiymətinin azaldılmasını tələb etmək hüququna malikdir. Bu, əsasən məhsuldakı qüsurun aradan qaldırılması mümkün olduqda və alıcı məhsulu qaytarmaq istəmədikdə tətbiq olunur.

Bundan əlavə, vətəndaş məhsulun pulsuz təmir edilməsini tələb edə bilər. Təmir mümkün olmadıqda və ya məqsədəuyğun sayılmadıqda isə alıcı müqavilədən imtina edərək ödədiyi məbləğin geri qaytarılmasını tələb edə bilər.

Qanunvericiliyə görə, məhsulda qüsur aşkar edildiyi halda istehlakçı bu tələbləri müəyyən edilmiş müddət ərzində irəli sürməlidir. Əksər hallarda bu müddət məhsulun zəmanət dövrü ilə müəyyən olunur.

Belə hallarda vətəndaş mütləq şəkildə çek, qəbz və ya alış sənədini saxlamalıdır. Bu sənədlər hüquqların müdafiəsi zamanı əsas sübut kimi çıxış edir.

Əgər satıcı istehlakçının qanuni tələblərini yerinə yetirməkdən imtina edərsə, vətəndaş müvafiq icra orqanlarına və ya məhkəməyə müraciət edərək öz hüquqlarını bərpa edə bilər.

İstehlakçılar bilməlidir ki, keyfiyyətsiz məhsulla qarşılaşdıqda seçim hüququ yalnız satıcıya deyil, məhz alıcıya məxsusdur və bu hüquqlar qanunla qorunur".

Telegramda izləyin