Qısqanclıq haradək "normal" sayılır? - AÇIQLAMA

Münasibətlərdə qısqanclıq çox zaman sevginin göstəricisi kimi dəyərləndirilir, lakin hər zaman bu davranış sağlam hesab edilə bilməz.

İnsanların bir-birinə qarşı müəyyən səviyyədə qısqanclıq hissi olması normaldır, ancaq bu hissin ölçüsü və tezliyi münasibətin keyfiyyətinə ciddi təsir göstərə bilər.

Bəs görəsən qısqanclıq haradək "normal" sayılır?

Psixoloq Gülsər Qədirli bu barədə Sonxeber.az -a açıqlama verib:

"Qısqanclıq yalnız etibar və bağlılıq hissini gücləndirən ölçüdə normal sayılır. Yəni tərəfdaşlar arasında müəyyən sərhədləri aşmayan, münaqişəyə və narahatlığa səbəb olmayan, qarşılıqlı hörmət çərçivəsində ortaya çıxan qısqanclıq sağlam hesab olunur.

Ancaq qısqanclıq hissi davamlı nəzarət etməyə, tərəfdaşı məhdudlaşdırmağa, təhqir və ya fiziki zorakılığa yol açırsa, artıq patologiyaya çevrilir. Belə hallarda münasibətdə gərginlik, stress və emosional yorğunluq yaranır. Həddindən artıq qısqanclıq özünəinamın zəif olması, keçmiş travmalar və ya etibar problemləri ilə bağlı ola bilər.

Əgər qısqanclıq münasibətə mənfi təsir göstərirsə, fərdlər öz duyğularını analiz etsin, etibar problemini üzə çıxarsın və zəruri olduqda terapiya ilə dəstəklənsin. Sağlam sevgi etibar və sərhəd anlayışı üzərində qurulur, həddindən artıq qısqanclıq isə əks effekt yaradır".

Telegramda izləyin