Həddindən artıq düşünmək hansı psixoloji səbəblərdən yaranır? - AÇIQLAMA

Gündəlik həyatın sürətli ritmi, artan məsuliyyətlər və qeyri-müəyyənliklər bir çox insanı eyni düşüncələr ətrafında ilişib qalmağa vadar edir.

Bəzən adi analiz kimi başlayan bu proses zamanla idarəolunmaz hala gəlir və "həddindən artıq düşünmək" kimi tanınan psixoloji vəziyyətə çevrilir.

Bəs görəsən həddindən artıq düşünmək hansı psixoloji səbəblərdən yaranır və bunun qarşısını necə almaq olar?

Psixoloq Gülsər Qədirli bu barədə Sonxeber.az -a açıqlama verib:

"Bunun əsas səbəbləri adətən daxili narahatlıqlar və emosional yüklə bağlıdır. Ən çox rast gəlinən səbəblərdən biri narahatlıq hissidir. İnsan gələcəklə bağlı qeyri-müəyyənlik yaşadıqda, beyin mümkün bütün ssenariləri düşünərək özünü "hazırlamağa" çalışır. Lakin bu proses əksinə, insanı daha da gərginləşdirir.

Digər mühüm səbəb isə nəzarət ehtiyacıdır. Hər şeyi idarə etmək istəyən insanlar qərarlarının mükəmməl olmasına çalışır və nəticədə eyni mövzunu dəfələrlə analiz edirlər. Bu da qərarsızlıq və daxili yorğunluq yaradır. Keçmiş travmalar və ya uğursuz təcrübələr də bu halı gücləndirə bilər - insan eyni səhvi təkrarlamaqdan qorxduğu üçün düşüncələrindən çıxa bilmir.

Bunun qarşısını almaq üçün ilk addım düşüncələrin fərqinə varmaqdır. İnsan anlamalıdır ki, düşünmək və həddindən artıq düşünmək eyni şey deyil. Özünə "Bu düşüncə mənə fayda verir, yoxsa sadəcə məni yorur?" sualını vermək faydalıdır.

Praktik olaraq isə diqqəti yönləndirmək çox effektiv üsuldur. Fiziki fəaliyyət, gündəlik planlama və ya zehni məşğul edən fəaliyyətlər məsələn, oxumaq, yazmaq və.s.aşırı düşünmənin qarşısını alır. Eyni zamanda, düşüncələri yazmaq da rahatlaşdırıcı təsir göstərir.

Əgər bu hal uzun müddət davam edirsə və insanın gündəlik həyatına təsir edirsə, psixoloji dəstək almaq vacibdir".

Telegramda izləyin