Avtomobil qəzası zamanı tərəflər arasında zərərin ödənilməsi necə tənzimlənir? - AÇIQLAMA

Avtomobil qəzaları gündəlik həyatda ən çox rast gəlinən hüquqi mübahisələrdən biridir. Belə hallarda zərərin kim tərəfindən və hansı qaydada ödənilməsi məsələsi tərəflər arasında ən çox müzakirə olunan mövzuya çevrilir.

Bəs görəsən avtomobil qəzası zamanı tərəflər arasında zərərin ödənilməsi necə tənzimlənir?

Hüquqşünas Xanım Yusifova mövzu ilə bağlı Sonxeber.az -a açıqlama verib:

"Avtomobil qəzası zamanı zərərin ödənilməsi əsasən hadisənin başvermə şəraiti və günahın kimdə olmasından asılıdır. Azərbaycan Respublikasının mülki qanunvericiliyinə əsasən, zərər vuran şəxs həmin zərəri tam həcmdə ödəməyə borcludur. Əgər qəza yol hərəkəti qaydalarının pozulması nəticəsində baş veribsə, məsuliyyət həmin qaydaları pozan sürücünün üzərinə düşür.

Əvvəlcə hadisə yerində yol polisi tərəfindən protokol tərtib olunur və qəzanın səbəbləri müəyyənləşdirilir. Bu sənəd sonradan zərərin ödənilməsi prosesində əsas sübut kimi çıxış edir. Əgər sürücülər arasında icbari sığorta müqaviləsi mövcuddursa, zərər müəyyən həddə qədər sığorta şirkəti tərəfindən qarşılanır. Daha böyük zərər olduqda isə fərq məbləği günahkar tərəf tərəfindən ödənilir.

Tərəflər arasında razılaşma əldə olunmadığı halda məsələ məhkəmə qaydasında həll edilir. Məhkəmə isə yol-nəqliyyat hadisəsinin materiallarını, şahid ifadələrini və ekspert rəylərini nəzərə alaraq qərar verir.

Belə hallarda vətəndaşların ən vacib addımı hadisə yerini düzgün sənədləşdirmək, sığorta şirkətinə vaxtında müraciət etmək və hüquqi prosedurları gecikdirməməkdir".

Telegramda izləyin