"Andrey Babişin ölkəmizə səfəri Azərbaycan-Çexiya arasındakı əlaqələrin dinamik şəkildə inkişafını göstərir"- DEPUTAT

"Prezident İlham Əliyevin 2026-cı il aprelin 27-də Çex Respublikasının Baş naziri Andrey Babişin Azərbaycana səfəri zamanı mətbuata verdiyi bəyanat ölkəmizin daim artan diplomatik gücünün göstəricisidir".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, bu gün bir dövlətlərlə çox fəal siyasi dialoqumuz var:

"Çex Respublikasının Baş naziri Andrey Babişin Azərbaycana səfəri iki ölkə arasındakı əlaqələrin dinamik şəkildə inkişafını göstərir. Səfər çərçivəsində bir çox məsələlər - həm regional, həm ikitərəfli, həm də daha qlobal xarakter daşıyan məsələlər ətrafında fikir mübadiləsi aparılmışdır. Cənab prezident İlham Əliyevin də vurğuladığı kimi iqtisadi sahədə görüləcək işlərlə bağlı konkret təkliflər var. Bilirsiniz ki, baş nazirlə birlikdə Azərbaycana Çexiyadan böyük qrup iş adamları gəlmişdi və keçirilən biznes-forumda həm yeni təmaslar quruldu, həm də mövcud layihələrlə bağlı fikir mübadiləsi aparıldi. Bizim məqsədimiz ticarət dövriyyəmizi daha da yüksək səviyyəyə qaldıraq. Amma bu gün də ticarət dövriyyəmiz əhəmiyyətli dərəcədə artmışdır, 800 milyon dollardan çoxdur. Əgər biz ticarət dövriyyəsinin strukturuna baxsaq görərik ki, burada əsasən Azərbaycan neftinin ixracı gözə dəyir. Ona görə biz ticarət dövriyyəsinin daha tarazlı olmasını və strukturun təkmilləşdirilməsini arzulayırıq.Əminəm ki, biz buna nail olacağıq. Çünki səfər zamanı həm təkbətək görüşdə, həm heyətlərin iştirakı ilə aparılan danışıqlarda bir çox konkret iqtisadi və sərmayə yönümlü layihələr müzakirə edildi".

Deputat vurğulayıb ki, Çexiya Respublikası ilə əməkdaşlığımızın böyük hissəsi energetika sektoruna aiddir:

"Burada da uzun illər ərzində Çexiya və Azərbaycan çox etibarlı tərəfdaşlardır. Azərbaycan nefti Çexiyaya ixrac edilir və Çexiyanın enerji balansında önəmli yer tutur. Azərbaycan dünya bazarlarına öz enerji resurslarını ixrac edən etibarlı ölkələr sırasındadır. Bunu, o cümlədən Avropa İttifaqı da qeyd edir və Azərbaycanı etibarlı tərəfdaş kimi qiymətləndirir.Azərbaycan qazı 16 ölkəyə ixrac edilir və onlardan 10 ölkə Avropa İttifaqının üzvüdür.
O cümlədən Azərbaycan Çexiyaya qonşu olan ölkələrə təbii qaz ixrac edir. Ölkə başçısının da qeyd etdiyi kimi görüş zamanı bu barədə də danışılıb. Bu sahədə gələcək əməkdaşlıq haqqında qərara gəlindi. Biz buna daha geniş prizmadan yanaşırıq. Yəni bu, sadəcə olaraq, ticarət əməliyyatları, enerji resurslarının ixracı əməliyyatları olmayacaq. Biz buna daha genişmiqyaslı, uzunmüddətli əməkdaşlıq kimi yanaşırıq. Ölkələrimiz arasında digər önəmli əməkdaşlıq sahəsi müdafiə sənayesi ilə bağlıdır. Burada da uzun müddət ərzində uğurlu əməkdaşlıq aparılır. Biz Çexiyadan bir çox hərbi təyinatlı məhsullar alırıq və indiki mərhələdə birgə istehsalla bağlı konkret layihələr üzərində danışıqlar gedir. Əminəm ki, bu sahə də çox genişmiqyaslı olacaq. Çünki Azərbaycan öz müdafiə potensialını, o cümlədən yerli istehsal hesabına təmin edir və gələcəkdə bu sahədə böyük təcrübəsi olan Çexiya kimi ölkələrlə bizim müştərək işlərimiz xüsusi önəm daşıyır. Bir sözlə səfər çərçivəsində bir çox digər sahələr ətrafında fikir mübadiləsi aparıldı. Hökumətlərarası Komissiyanın tezliklə tədbir keçirməsi, yenidən görüşməsi ilə bağlı fikir mübadiləsi aparılmışdır. Çex Respublikasının Baş naziri Andrey Babişin Azərbaycana səfəri Çexiya-Azərbaycan dostluğunu daha da möhkəmləndirməklə yanaşı, əməkdaşlığın genişləndirilməsi istiqamətində bizim qarşımızda çox gözəl perspektivlər açır".

Telegramda izləyin