İş yerində mobbinq insanın psixologiyasına necə təsir edir? - AÇIQLAMA

Müasir dövrdə insanların həyatının böyük hissəsi iş mühitində keçir. Bu səbəbdən iş yerindəki münasibətlər insanın həm psixoloji vəziyyətinə, həm də ümumi həyat keyfiyyətinə ciddi təsir göstərir. Son illərdə daha çox rast gəlinən problemlərdən biri də mobbinqdir.

Yəni iş yerində əməkdaşa qarşı davamlı təzyiq göstərilməsi, alçaldılması, təcrid olunması və psixoloji basqıya məruz qalmasıdır.

Bəs belə davranışlar insan psixologiyasında hansı izlər buraxır?

Psixoloq Gülsər Qədirli bu barədə Sonxeber.az -a danışıb:

"İş yerində mobbinq insanın özünəinamını zəiflədən ən təhlükəli amillərdən biridir. Daim tənqid olunan, aşağılanan və ya görməzdən gəlinən şəxs zamanla özünü dəyərsiz hiss etməyə başlayır. Bu isə özgüvənin azalmasına, qərar verməkdə çətinliyə və sosial münasibətlərdə qapanmaya səbəb olur.

Mobbinqə məruz qalan insanlarda stress səviyyəsi yüksəlir. Onlar işə getməzdən əvvəl narahatlıq, gərginlik, qorxu və təşviş yaşayırlar. Uzun müddət davam etdikdə isə bu vəziyyət depressiya, panik atak, yuxu pozuntuları və xroniki yorğunluq kimi problemlərə yol aça bilər.

Bundan əlavə, mobbinq insanın motivasiyasını azaldır. Şəxs öz bacarıqlarını göstərə bilmədiyini düşündüyü üçün iş performansı aşağı düşür, yaradıcılığı zəifləyir və karyerasına qarşı ümidsizlik yaranır. Bəzi hallarda bu şəxslər işdən ayrılmağa və ya peşəsini dəyişməyə məcbur qalırlar.

Ən vacib məqam odur ki, mobbinq normal davranış kimi qəbul edilməməlidir. Belə hallarla qarşılaşan şəxslər susmamalı, rəhbərliklə, insan resursları şöbəsi ilə danışmalı, hüquqlarını bilməli və lazım gəldikdə psixoloji dəstək almalıdırlar. Sağlam iş mühiti insanın həm uğuru, həm də ruhi sağlamlığı üçün əsas şərtdir".

Telegramda izləyin