Niyə bəzi qadınlar "hər şeyi özüm edərəm" deyir?

"40 yaşdan sonra qadınlarda çox vaxt tam müstəqillik düşüncəsi formalaşır və bu, onların münasibətlərinə və davranışına təsir edir".

Milli.Az xəbər verir ki, bunu rusiyalı psixoloq Veronika Axmetova yerli mətbuata danışıb.

Ekspertin sözlərinə görə, burada əsas rolu keçmiş təcrübə oynayır. Bu yaşa qədər bir çox qadın münasibətlərdə məyusluq yaşadığı üçün başqa bir insana arxalanmağı risk mənbəyi kimi qəbul etməyə başlayır.

"Qırx yaşına qədər qadın bir neçə dəfə uduzub, münasibətlərə sərmayə qoyub, ehtiyaclarının necə nəzərə alınmadığını hiss edib. O, kişiyə güvənib, ona arxalanıb, amma sonu xəyanətlə nəticələnib. Bu, onu dəyərsizləşdirib. Beyin bunu yadda saxlayır və nəticədə belə bir reaksiya formalaşır ki, başqasına arxalanmaq ağrı və qeyri-sabitlik deməkdir", - deyə Axmetova bildirib.

Psixoloq vurğulayıb ki, müstəqillik bəzən müdafiə strategiyasına çevrilir. Belə ki, qadın kömək istəməkdən çəkinir, çünki imtinanı öz lazımsızlığının təsdiqi kimi qəbul edir. Digər amil isə 1990-2000-ci illərdə formalaşan sosial stereotiplərdir - "hər şeyi özü bacaran güclü qadın" obrazı norma halına gəlib.

Onun sözlərinə görə, münaqişələrin səbəblərindən biri də nəzarətə meyldir - qadın düşünür ki, hər şeyi yalnız özü düzgün edə bilər. Psixoloq bildirib ki, vəziyyəti dəyişmək üçün daxili düşüncə və inamlarla işləmək, həmçinin güvənməyi öyrənmək vacibdir. Praktika olaraq isə kömək üçün təşəkkür etməyi və tədricən məsuliyyətləri bölüşməyi tövsiyə edib.

Ekspert əlavə edib ki, hətta sadə vərdişlər - məsələn, mütəmadi olaraq kömək istəmək - narahatlığı azaltmağa və davranış modelini dəyişməyə kömək edir. Onun sözlərinə görə, "hər şeyi özüm edərəm" sindromu emosional dəstək alınmadıqda münasibətlərin pozulmasına səbəb ola bilər. Problemin həlli isə müstəqillikdən imtina etməkdə deyil, müstəqilliklə tərəfdaşa güvən arasında balans yaratmaqdadır.

Telegramda izləyin