Süni intellekt insan təfəkkürünü zəiflədir, yoxsa imkanlarını genişləndirir? - AÇIQLAMA

Süni intellektin sürətlə inkişaf etdiyi bir dövrdə onun insan düşüncəsinə təsiri ilə bağlı müzakirələr də artır.

Bəziləri hesab edir ki, AI insanları tənbəlləşdirir və düşünmə qabiliyyətini zəiflədir, digərləri isə bunu sadəcə işi asanlaşdıran texnoloji vasitə kimi qiymətləndirir.

Bəs doğrudanmı insanlar artıq araşdırmaq və analiz etmək əvəzinə hazır cavablara üstünlük verir? Süni intellekt insan təfəkkürünü zəiflədir, yoxsa imkanlarını genişləndirir?

Mövzu ilə bağlı İKT mütəxəssisi Elvin Həsənov Sonxeber.az -a açıqlama verib:

"Süni intellektin insanın təfəkkürünü zəiflədəcəyi ilə bağlı narahatlıqlar müəyyən qədər başa düşüləndir, çünki doğrudan da insanlar bəzi hallarda düşünmək əvəzinə hazır cavaba üstünlük verməyə başlayır. Burda əsas məsələ alətin özü yox, istifadə vərdişidir. Gündəlik həyatda görürük ki, insanlar getdikcə daha çox hazır cavaba öyrəşir. Yəni axtarmaq, analiz etmək, müqayisə etmək əvəzinə birbaşa nəticəni götürür. Bu, uzun müddətdə düşünmə vərdişlərinə təsir edir. Öncəki zamanlara baxsaq və araşdırsaq görərik ki, tarix boyu hər yeni texnologiya çıxanda eyni müzakirə olub. Kalkulyator çıxanda da deyirdilər ki, insanlar hesablamanı unudacaq, internet yayılarkən də deyirdilər ki, yaddaş zəifləyəcək. Amma nəticədə bu alətlər insanın imkanlarını məhdudlaşdırmayıb, əksinə genişləndirib. Mən deyərdim ki, süni intellekt də eyni məntiqdədir. Daha sadə düşünsək AI kalkulyator kimi görək. Əgər insan hesablamanın məntiqini bilirsə, kalkulyator onun işini sürətləndirəcək. Əgər bilmirsə, sadəcə düymə basan istifadəçiyə çevriləcək. Qadağa məsələsinə gəldikdə isə, texniki baxımdan belə texnologiyaların tam qadağan olunması nə realdır, nə də effektivdir. Çünki AI artıq qlobal texnologiyadır və müxtəlif platformalarda geniş yayılıb. Qadağa olsa belə, insanlar alternativ yollar tapacaq. Məncə burda əsas diqqət maarifləndirməyə yönəlməlidir. İnsanlara süni intellektdən necə düzgün istifadə etmək, hansı hallarda ona güvənmək, hansı hallarda öz düşüncəsini işə salmaq lazım olduğu öyrədilməlidir".

Telegramda izləyin