Yuxu pozuntuları psixoloji problemlərin xəbərçisidir? - AÇIQLAMA

Yuxu insan psixikasının ən həssas göstəricilərindən biridir və çox vaxt daxildə baş verən emosional dəyişikliklər ilk olaraq məhz yuxu rejimində özünü göstərir.

Son dövrlərdə yuxuya getməkdə çətinlik, tez-tez oyanma və ya keyfiyyətsiz yuxu kimi şikayətlərin artması bu mövzunu daha da aktuallaşdırır.

Bəs yuxu pozuntuları sadəcə yorğunluqdan yaranır, yoxsa daha dərin psixoloji problemlərin xəbərçisi ola bilər?

Psixoloq G.Qədirli bu barədə Sonxeber.az -a açıqlama verib:

"Yuxu pozuntuları çox vaxt təkbaşına bir xəstəlik deyil, psixoloji vəziyyətin "siqnal sistemi"dir. Yəni insanın daxilində gərginlik, narahatlıq və ya emosional yüklənmə artdıqda beyin istirahət rejiminə tam keçə bilmir. Bu zaman ən çox rast gəlinən səbəblərdən biri xroniki stressdir. İnsan gün ərzində yaşadığı gərginliyi tam emal etmədikdə, bu yük gecə saatlarında yuxunu parçalayır və ya ümumiyyətlə yuxuya getməni çətinləşdirir.

Bundan başqa, narahatlıq pozuntuları və depressiv vəziyyətlər də yuxu ritmini ciddi şəkildə dəyişə bilir. Məsələn, bəzi insanlarda yuxusuzluq, digərlərində isə həddindən artıq çox yatma meyli müşahidə olunur. Bu fərqliliklər psixikanın hansı istiqamətdə yükləndiyindən asılıdır.

Vacib məqamlardan biri də odur ki, uzun müddət davam edən yuxu pozuntuları artıq təkcə psixoloji deyil, fiziki sağlamlığa da təsir edir: diqqət zəifləyir, emosional dayanıqlıq azalır, qərarvermə qabiliyyəti zəifləyir. Bu da bir növ "zəncirvari reaksiya" yaradır.

Ona görə də yuxu problemi davamlı hal alırsa, onu yalnız "yorğunluq" kimi qəbul etmək düzgün deyil. Bu, çox vaxt orqanizmin və psixikanın köməyə ehtiyacı olduğuna dair ilkin siqnallardan biri kimi qiymətləndirilməlidir".

Telegramda izləyin