Nəsillərarası travma insan həyatına necə təsir edir? - PSİXOLOQ

Bəzən insan səbəbini anlamadığı qorxu, narahatlıq və ya emosional yük daşıyır. Maraqlıdır ki, bəzi hisslər və davranışlar insanın öz yaşantısından deyil, ailə tarixindən və əvvəlki nəsillərin keçirdiyi ağır travmalardan qaynaqlana bilər. Bəs irsi travmalar necə yaranır və insan həyatına hansı formada təsir edə bilər?

Mövzu ilə bağlı Sonxeber.az-a psixoloq Samirə Bağırova danışıb.

O, açıqlamasında qeyd edib ki, irsi travma və ya nəsillərarası travma insanın birbaşa yaşamadığı, amma ailəsinə mənsub əvvəlki nəsillərin keçirdiyi ağır hadisələrin təsirinin sonrakı nəsillərə ötürülməsidir:

"Bu travmalar bir neçə yolla ötürülə bilir. Məsələn, tərbiyə modeli yolu ilə - travma yaşamış valideynlər və ya nənə-babalar çox ehtiyatlı, həddindən artıq nəzarətçi, daim təhlükə gözləyən davranış sərgiləyə bilərlər. Uşaq isə bunu normal həyat modeli kimi qəbul edib davam etdirir.

Digər səbəb isə ailə içində gizli gərginliklərin olmasıdır, amma səssizlik hökm sürür. Çünki ailə emosional ünsiyyət qurmur, yaşadığı və hiss etdiyi ağır duyğular haqqında danışmır. Bəzi mövzulara qorxu və gərginliklə yanaşılır. Səbəbini bilməyən uşaqda da həmin mövzulara qarşı emosional yük yaranır.

Son illərin araşdırmaları hətta onu göstərib ki, tez-tez stress hissi keçirən insanlar bu stressi bioloji olaraq özlərindən sonrakı nəsillərə də ötürə bilirlər. Bu isə digər nəsillərdə səbəbsiz daimi narahatlıq hissi, münasibətlərdə həddindən artıq bağlanmaq, "həmişə pis nəsə ola bilər" düşüncəsi kimi özünü büruzə verir".

Vüsalə İbrahimli

Telegramda izləyin