Smartfonların istifadəsi ilə doğum səviyyəsi azalır

Smartfonların geniş yayılması dünyanın müxtəlif ölkələrində doğum səviyyəsinin aşağı düşməsi ilə əlaqələndirilib.

Sonxeber.az xarici mediaya istinadən xəbər verir ki, bu nəticəyə "Financial Times" nəşrinin jurnalistləri müxtəlif ölkələrdə mobil telefonların yayılması ilə bağlı statistik məlumatları təhlil etdikdən sonra gəliblər.

Məqalədə qeyd olunur ki, ABŞ, Böyük Britaniya və Avstraliyada yeniyetmə və gənclər arasında doğum göstəricilərində 2007-ci ildən etibarən kəskin azalma başlayıb. Oxşar tendensiya 2009-cu ildə Fransa və Polşada, 2012-ci illərdə isə Meksika, Mərakeş və İndoneziyada qeydə alınıb.

Araşdırmada bildirilir ki, bu dəyişikliklər smartfon satışlarının artması və mobil tətbiqlərin yüklənməsi ilə bağlı "Google" axtarışlarının çoxalması ilə zaman baxımından üst-üstə düşür.

Demoqraf Layman Stoun bildirir ki, insanlar real həyatda daha az ünsiyyət qurduqda münasibət qurmaq və ailə yaratmaq da çətinləşir.

Araşdırma zamanı daha bir tendensiya da diqqət çəkib - ali təhsili olmayan gənc qadın və kişilər arasında ideoloji fərqlərin artması. Bildirilir ki, bu amil də cütlüklərin formalaşmasına və doğum səviyyəsinə mənfi təsir göstərir.

Nəşr doğum göstəricilərinin azalmasına təsir edən digər səbəblər sırasında uşaqların mənzillə təmin edilməsinin çətinləşməsini və ali təhsilli qadınların sayının artmasını da göstərib.

Telegramda izləyin