Qəbir yerlərinin satışı qanunidirmi? - AÇIQLAMA

Hazırda vəfat edən şəxslərin dəfn olunacağı qəbir yerləri üçün xüsusi qiymətlər təklif edilməsi müzakirələrə səbəb olur. Bəzi qəbir sahələrinin qiymətinin 20 min manata qədər yüksəldiyi bildirilir. Bu isə "Qəbir yerlərinin satışı qanunidirmi?" sualını gündəmə gətirir. Bəs qanun bu məsələ ilə bağlı nə deyir?

Vəkillər Kollegiyasının üzvü Rəşad Əliyev bu barədə Sonxeber.az -a açıqlama verib:

"Azərbaycan Respublikası vətəndaşlarının, Azərbaycan Respublikasında olan və ya yaşayan, habelə qaçqın statusu alan əcnəbi və ya vətəndaşlığı olmayan və kimsəsiz şəxslərin dəfn olunması üçün qəbir yerləri qəbiristanlığın müdiriyyəti tərəfindən ödənişsiz ayrılır.

Bu, Nazirlər Kabinetinin "Qəbiristanlıqların salınması və idarə olunması" barədə 2018-ci il 4 dekabr tarixli 522 nömrəli Qərarının 17.2-ci maddəsində nəzərdə tutulub.
Qəbiristanlıq ərazisindəki qəbir yerləri yaşayış məntəqəsinin əhalisinin dini mənsubiyyətinə və milli adət və ənənələrinə uyğun olaraq, qəbir yerlərinin bu Qaydalarla müəyyən edilmiş ölçüləri nəzərə alınmaqla, seksiyalara ayrılmalıdır və qəbiristanlığın giriş qapısındakı elan lövhəsində aydın görünən və oxunan yerdə bu barədə məlumat yerləşdirilir.

Qəbir yerindən yalnız dəfn olunmuş şəxsin Azərbaycan Respublikasının Ailə Məcəlləsi ilə müəyyən edilmiş yaxın qohumları təkrar istifadə etmək hüququna malikdirlər.

Qeyd edək ki, qəbiristanlığın müdiriyyəti bələdiyyə tərəfindən vəzifəyə təyin və vəzifədən azad olunur. Qəbiristanlığın müdiriyyəti dəfn edilmiş şəxsin qohumları, qanuni nümayəndələri və ya onun dəfni ilə bağlı xərcləri çəkmiş şəxslərlə bağlanılmış müqavilə əsasında qəbir yerlərinə və qəbirüstü tikililərə ödənişli əsaslarla qulluq edilməsini təmin edə bilər.

Qəbristanlığın qorunması, qəbir yerlərinin, piyada səkilərinin və yolların (cığırların) səliqəli saxlanılmasını, yaşıllıqların mühafizəsini və onlara qulluq edilməsi və s. müdriyyətin vəzifələrinə aiddir"

Telegramda izləyin