Panik atak zamanı insan nə etməlidir? - AÇIQLAMA

Panik atak son illər cəmiyyətdə ən çox rast gəlinən psixoloji problemlərdən biri hesab olunur.

Ani qorxu hissi, nəfəs darlığı, ürək döyüntüsünün sürətlənməsi və ölüm qorxusu ilə müşahidə olunan bu vəziyyət bir çox insan üçün olduqca ağır keçir.

Bəs görəsən panik atak zamanı insan nə etməlidir?

Psixoloq Gülsər Qədirli bu barədə Sonxeber.az -a açıqlama verib:

"Panik atak zamanı ilk növbədə insan baş verənlərin həyati təhlükə olmadığını qəbul etməlidir. Çünki panik atak zamanı yaşanan fiziki əlamətlər çox qorxuducu görünsə də, əksər hallarda bir müddət sonra azalır. Bu zaman nəfəsi yavaş və dərin şəkildə tənzimləmək vacibdir. Burundan yavaş nəfəs almaq, bir neçə saniyə saxlamaq və asta şəkildə vermək bədənin sakitləşməsinə kömək edir".

Mütəxəssis həmçinin diqqətin qorxu yaradan düşüncələrdən yayındırılmasının önəmli olduğunu vurğulayıb:

"İnsan ətrafındakı əşyaları saymaq, eşitdiyi səslərə fokuslanmaq və ya yaxın biri ilə danışmaqla panikanın təsirini azalda bilər. Panik ataklar tez-tez təkrarlanırsa, mütləq peşəkar dəstək almaq lazımdır. Çünki vaxtında göstərilən psixoloji yardım bu vəziyyətin gündəlik həyata mənfi təsirinin qarşısını almaqda mühüm rol oynayır".

Telegramda izləyin