"Aşırı qısqanclığ"ın sonu nədir? - AÇIQLAMA

Qısqanclıq insan münasibətlərində tamamilə normal duyğulardan biridir. İnsan sevdiyini itirməkdən, aldadılmaqdan və ya dəyərsiz hiss etməkdən qorxa bilər. Amma bu hiss müəyyən həddi keçəndə artıq münasibəti qoruyan deyil, münasibəti zədələyən bir davranışa çevrilir.

Xüsusilə "aşırı qısqanclıq" həm qısqanan insanı yorur, həm də qarşı tərəfdə boğulma hissi yaradır.

Bəs "aşırı qısqanclığ"ın sonu nədir?

Psixoloq Gülsər Qədirli bu barədə Sonxeber.az -a açıqlama verib:

"Aşırı qısqanclığın əsas səbəbi çox vaxt sevgidən daha çox güvənsizlik olur. İnsan özünü kifayət qədər dəyərli hiss etməyəndə, tərk edilmək qorxusu yaşayanda və ya keçmişdə xəyanət, travma, etibarsız münasibət görəndə bu hiss daha güclü ortaya çıxır. Belə insanlar qarşı tərəfin hər davranışında təhlükə axtarmağa başlayırlar: gec cavab vermək, sosial şəbəkədə aktiv olmaq, başqa biri ilə danışmaq belə problemə çevrilə bilir.

Bir çox insan qısqanclığı "çox sevmək" kimi romantikləşdirir. Halbuki sağlam sevgi güvən üzərində qurulur. İnsan sevdiyini qorumaq istəyə bilər, amma onu nəzarət altında saxlamaq istəyi artıq psixoloji problemə çevrilə bilər.

Aşırı qısqanclıq zamanla münasibətdə dava və gərginliyi artır, qarşı tərəfdə uzaqlaşma hissi formalaşır, hətta münasibət zamanla toksikləşir.

Bu hissin idarə olunması üçün insan əvvəlcə qısqanclığın kökündə duran səbəbi anlamalıdır. Özünəinam üzərində işləmək, açıq ünsiyyət qurmaq və lazım olduqda psixoloji dəstək almaq vacibdir. Çünki sevgi insanı rahat və təhlükəsiz hiss etdirməlidir, daim stress və qorxu içində saxlamamalıdır".

Telegramda izləyin