"WUF13 işıqlandırması və onun informasiya təminatının peşəkar şəkildə qurulması xüsusi diqqət çəkən məqamlardan biri oldu" - DEPUTAT

"Bu gün Azərbaycan beynəlxalq tədbirlərin keçirildiyi mərkəzə çevrilməklə yanaşı həm də mötəbər beynəlxalq forumların hazırlanması, təşkili və keçirilməsi baxımından hətta bir nümunə, bir brend formalaşdırır".

Bunu Sonxeber.az-a danışan deputat Vüqar İskəndərov bildirib.

Deputat qeyd edib ki, Bakıda keçirilən WUF13 forumu indiyədək keçirilən BMT-nin qlobal tədbirləri arasında ən çox iştirakçının qatıldığı və yüksək səviyyədə hazırlanan, təşkil olunmuş tədbirlərdən biri kimi tarixdə qalacaq:

"Forum çərçivəsində cənab prezident İlham Əliyevin iştirakı ilə Liderlər Konfransı keçirildi. Eləcə "Baku Urban Awards" mükafatı təsis olundu. Qeyd edildi ki, bu mükafathər il bu ad altında təqdim ediləcək. Təbii ki, WUF tarixində ilk dəfə olaraq bəzi mühüm məsələlər yalnız Bakı şəhərində təşkil olunan 13-cü sessiyada səsləndirildi. Biz həmçinin dünyanın şəhərlərdə yaşayış, mənzil problemləri, inklüzivlik və gələcəyin şəhərlərinin necə formalaşacağı ilə bağlı məsələlərin müzakirəsində fəal iştirak etdik. Azərbaycanın bu sahədə təcrübəsi var. Dünyanın gələcəyə aid düşüncə səviyyəsində nəzərdə tutduğu bir çox layihələri biz artıq həyata keçirmişik. "Ağıllı kənd" və "ağıllı şəhər" konsepsiyalarımız təqdim olundu.

Forumda eyni zamanda, Azərbaycanın keçdiyi işğal yolunu, torpaqlarımızın işğal olunmasını və şəhər-kəndlərimizin dağıdılmasını, daha sonra Vətən müharibəsində qazanılan qələbə ilə bu ədalətsizliyin aradan qaldırılmasını, beynəlxalq hüququn və ədalətin bərpa olunmasını nümayiş etdirdik. Post-müharibə dövründə şəhər və kəndlərimizin yenidən qurulmasını, onların hansı formatda və hansı konsepsiya əsasında yaradıldığını da təqdim etdik.

Bütün bu məsələlər və təcrübələrin bölüşdürülməsi düşünürük ki, WUF13 kimi qlobal tədbiri daha da işgüzar səviyyəyə çatdırdı. Burada müzakirə olunan yeniliklər və məsələlər gələcəkdə şəhərlərin problemlərinin həllində nəzərə alınacaq. WUF13 dünyamızın gələcəyi, insanların yaşayış mühiti və müasir şəhərlərin qarşılaşacağı çağırışların həlli yollarını axtaran mühüm platforma kimi çıxış etdi. Azərbaycanın bu tədbirdəki təqdimatı, eləcə də Qarabağ və Şərqi Zəngəzurda həyata keçirilən müasir layihələrin nümayiş etdirilməsi ölkəmizin dünyada tanıdılması baxımından əvəzsiz rol oynadı".

Deputat vurğulayıb ki, Bakıda keçirilən World Urban Forum 13-ün final mərhələsi bu gün uğurla başa çatıb. Forum çərçivəsində gün ərzində şəhərsalma, dayanıqlı inkişaf, iqlim dəyişiklikləri, nəqliyyat infrastrukturu və "ağıllı şəhər" həlləri kimi mövzuları əhatə edən panel sessiyalar, müzakirələr və tematik tədbirlər təşkil olunub:

"Bu bir neçə gün ərzində dünyanın müxtəlif ölkələrindən gələn nümayəndələr, ekspertlər və beynəlxalq təşkilatların təmsilçiləri tədbirdə iştirak edərək qlobal urbanizasiya gündəliyinə dair fikir mübadiləsi aparıblar. Forumda gənclərin iştirakı, innovativ yanaşmalar və müasir şəhər inkişafı modelləri də əsas müzakirə mövzuları sırasında yer alıb, eyni zamanda sərgilər, təqdimatlar və xüsusi görüşlər keçirilib. Tədbir beynəlxalq əməkdaşlığın genişləndirilməsi və şəhərlərin gələcək inkişaf strategiyalarının formalaşdırılması baxımından mühüm platforma kimi dəyərləndirilib.

WUF13 işıqlandırması və onun informasiya təminatının peşəkar şəkildə qurulması da xüsusi diqqət çəkən məqamlardan biri oldu. Bu mühüm forumun geniş və operativ şəkildə işıqlandırılmasında Azərbaycan mediasının, xüsusilə jurnalistlərin əməyi təqdirəlayiqdir. Çünki jurnalistlər forum günlərində həm yerli, həm də beynəlxalq auditoriyaya dolğun, obyektiv və operativ məlumat çatdırmaqla öz peşəkar bacarıqlarını bir daha nümayiş etdirməklə yanaşı həm də ölkəmizin üzərinə götürdüyü öhdəlikləri layiqincə yerinə yetirdiyini sübut etdilər".

Telegramda izləyin