Zibil qutusunda 33 ölü pişik tapılıb, baytar saxlanıldı

İzmirin Buca rayonunda dəhşətli hadisə baş verib. Küçədə yerləşən zibil konteynerinin qarşısında torbalara qoyulmuş halda 33 ölü pişik aşkarlanıb. Hadisə ilə bağlı araşdırmalara başlanılıb, 1 baytar həkim saxlanılıb.

Sonxeber.az xarici mediaya istinadən xəbər verir ki, hadisə barədə daxil olan şikayətdən sonra polis və aidiyyəti qurumların əməkdaşları əraziyə cəlb olunub. Aparılan baxış zamanı konteynerin önündə böyük və bala olmaqla ümumilikdə 33 pişiyin cansız bədəni tapılıb.

İzmir Respublika Baş Prokurorluğu məsələ ilə bağlı yazılı açıqlama yayıb. Açıqlamada bildirilib ki, hadisə üzrə "5199 saylı Heyvanların Qorunması Haqqında Qanunun pozulması" maddəsi ilə dərhal cinayət işi üzrə araşdırma başladılıb.

Qeyd olunub ki, hadisənin bütün detallarının üzə çıxarılması və məsul şəxslərin müəyyən edilməsi istiqamətində işlər davam etdirilir. Faktla əlaqəli olduğu ehtimal edilən 1 baytar həkim isə polis tərəfindən saxlanılıb.

Telegramda izləyin