"Kişilər avtomobili yoxlatmağa daha həvəslidir, nəinki öz sağlamlığını" - Sosioloqdan AÇIQLAMA

"Qadınların kişilərdən daha uzunömürlü olması tək Azərbaycanda yox, demək olar ki, bütün dünyada müşahidə olunan bir tendensiyadır və bunun həm bioloji, həm də sosial səbəbləri var. Bioloji baxımdan qadınların hormonal sistemi müəyyən üstünlüklər yaradır. Bu, bilinən bir faktdır ki, estrogen hormonu ürək-damar xəstəliklərinə qarşı orqanizmin davamlılığını artırır. Bundan əlavə, genetik tədqiqatlar göstərir ki, iki X xromosomuna sahib olmaq bəzi xəstəliklərə qarşı əlavə müdafiə mexanizmi formalaşdıra bilir".

Bu sözləri Sonxeber.az-a sosioloq Yusif Nəbiyev danışıb.

O, açıqlamasında qeyd edib ki, məsələni yalnız biologiya ilə izah etmək düzgün olmaz:

"Məlum məsələdir ki, insan ömrü laboratoriyada yox, məhz cəmiyyətin içində keçir. Ona görə də burada həyat tərzi amilləri çox ciddi rol oynayır. Bir çox cəmiyyətlərdə kişilik güclü olmağı şərtləndirir. Bu isə öz arxasında risk almaq, emosiyaları gizlətmək və köməyə ehtiyac duymadığını nümayiş etdirmək kimi davranışları gətirir. Cəmiyyət kişilərdən daim "güclü olmağı" tələb edir, amma bu güc nümayişinin sağlamlıq üzərindəki bədəli ağır olur. Bu psixologiyanın nəticəsidir ki, kişilər həkimə daha gec-gec gedirlər, psixoloji yardıma ehtiyac duyduqda bunu daha az paylaşır və büruzə verirlər. Nə qədər qəribə səslənsə də, kişilər üçün avtomobillərini texniki baxışa aparmaq daha asan görünür, nəinki profilaktik müayinəyə getmək və ya hansısa psixoloqa baş çəkmək. Paradoks isə ondadır ki, uzun müddət yaşamaq üçün insanın hər zaman güclü görünməsi yox, lazım gəldikdə zəif olduğunu və ya köməyə ehtiyacının olmasını da etiraf edə bilməsi vacibdir. Bundan əlavə, statistik göstəricilərə əsaslansaq, deyə bilərik ki, siqaret və alkoqol istifadəsi kimi zərərli vərdişlərə meyl də kişilər arasında daha yüksək yayılmışdır. Həmçinin daha təhlükəli və zərərli iş mühitlərində də kişilərin sayı qadınlarınkından qat-qat çoxdur".

Vüsalə İbrahimli

Telegramda izləyin