Şübhəli şəxsin müdafiə hüquqları hansı qanunlarla təmin olunur? - AÇIQLAMA

Azərbaycan qanunvericiliyində hər bir şəxsin müdafiə hüququ əsas hüquqlardan biri hesab olunur və cinayət təqibi zamanı bu hüququn təmin edilməsi dövlətin vəzifəsidir.

Şəxsin təqsirli olub-olmamasından asılı olmayaraq, ona qarşı aparılan istintaq və ya məhkəmə araşdırması müddətində qanunla müəyyən edilmiş müdafiə vasitələrindən istifadə etmək imkanı verilməlidir.

Bəs görəsən şübhəli şəxsin müdafiə hüquqları hansı qanunlarla təmin olunur?

Mövzu ilə bağlı hüquqşünas Xanım Yusifova Sonxeber.az -a açıqlama verib:

"Şübhəli və ya təqsirləndirilən şəxsin müdafiə hüquqları ilk növbədə Azərbaycan Respublikası Konstitusiyasının 61-ci maddəsi ilə təmin edilir. Həmin maddəyə əsasən, hər kəs yüksək keyfiyyətli hüquqi yardım almaq hüququna malikdir və qanunla nəzərdə tutulmuş hallarda bu yardım dövlət hesabına göstərilir.

Bundan əlavə, Cinayət-Prosessual Məcəlləsinə əsasən şübhəli şəxs özünə müdafiəçi seçmək, vəkillə məxfi görüşmək, ona qarşı irəli sürülən ittihamın mahiyyəti barədə məlumat almaq, ifadə vermək və ya ifadə verməkdən imtina etmək, sübutlar təqdim etmək, vəsatətlər qaldırmaq və istintaq orqanlarının qərarlarından şikayət vermək hüququna malikdir.

Qanunvericilikdə həmçinin təqsirsizlik prezumpsiyası prinsipi təsbit olunub. Bu prinsipə görə, şəxsin təqsiri məhkəmənin qanuni qüvvəyə minmiş hökmü ilə sübuta yetirilməyənədək o, təqsirsiz hesab edilir. İstintaq və məhkəmə orqanları müdafiə hüququnun həyata keçirilməsinə mane ola bilməz və bu hüququn pozulması prosessual qanun pozuntusu kimi qiymətləndirilə bilər.

Azərbaycan qanunvericiliyi şübhəli şəxsin müdafiə hüquqlarını geniş şəkildə tənzimləyir və bu hüquqların təmin olunması ədalətli məhkəmə araşdırmasının əsas şərtlərindən biri hesab edilir".

Telegramda izləyin