Uşaqlıqda eşidilən sözlər insanın xarakterinə nə dərəcədə təsir edir? - AÇIQLAMA

İnsanın şəxsiyyətinin formalaşmasında uşaqlıq dövrü xüsusi əhəmiyyət daşıyır.

Bu mərhələdə valideynlərdən, müəllimlərdən və yaxın ətrafdan eşidilən sözlər uşağın özünü necə dəyərləndirməsinə, ətraf aləmlə münasibət qurmasına və gələcək davranış modellərinə təsir göstərir.

Bəs görəsən uşaqlıqda eşidilən sözlər insanın xarakterinə nə dərəcədə təsir edir?

Psixoloq G.Qədirli mövzu ilə bağlı Sonxeber.az -a açıqlama verib:

"Uşaqlıqda eşidilən sözlər insanın xarakterinə düşündüyümüzdən daha güclü təsir göstərir. Uşaq özünü və dünyanı ilk növbədə valideynlərinin və yaxınlarının reaksiyaları vasitəsilə tanıyır. Ona tez-tez "sən bacarıqlısan", "sən bunu edə bilərsən" kimi dəstəkləyici ifadələr deyilirsə, özünəinam hissi daha sağlam formalaşır. Əksinə, davamlı şəkildə "səndən heç nə çıxmaz", "sən həmişə səhv edirsən" kimi mənfi mesajlar alan uşaqlarda özünə şübhə, uğursuzluq qorxusu və aşağı özgüvən yarana bilər.

Mənfi sözlərin təsiri yalnız uşaqlıq dövrü ilə məhdudlaşmır. Bir çox hallarda insan böyüdükdən sonra belə həmin ifadələri daxilində daşıyır və qərar verərkən, yeni işə başlayarkən və ya münasibət qurarkən özünü məhdudlaşdırır. Bu səbəbdən bəzi şəxslər uğur qazanmaq potensialına malik olsalar da, daxili qorxular və özlərinə qarşı sərt münasibət səbəbindən geri çəkilirlər.

Uşaqlıqda eşidilən mənfi sözlər insanın gələcəyini tam müəyyən etmir. Yetkin yaşlarda psixoloji dəstək almaq, özünü daha yaxşı tanımaq və mənfi düşüncə qəliblərini dəyişmək mümkündür. İnsan zamanla uşaqlıqdan gətirdiyi zərərli inancları yenidən qiymətləndirə və daha sağlam düşüncə tərzi formalaşdıra bilər.

Ona görə də valideynlərin və uşaqla ünsiyyətdə olan bütün şəxslərin istifadə etdiyi sözlərə diqqət yetirməsi vacibdir. Çünki uşağın eşitdiyi hər bir mesaj onun xarakterinin, özünə münasibətinin və gələcək həyatının formalaşmasında müəyyən iz buraxa bilər".

Telegramda izləyin