Gömrükçülərin sınaq müddəti necə qiymətləndiriləcək? - Yeni tələblər

Gömrük orqanlarında sınağın keçirilməsi qaydası və şərtləri təsdiqlənib.

Oxu.Az-ın məlumatına görə, bununla bağlı müvafiq qərar imzalanıb.

Qərara əsasən, qeyd olunan şəxslər barəsində sınaq müddəti müəyyən edilməyəcək və onlar müvafiq vəzifəyə təyin olunmaqla gömrük orqanlarında daimi xidmətə qəbul olunacaqlar:

- gömrük orqanlarında rəhbər vəzifələrə təyin olunan şəxslər;

- dövlət qulluqçusu və ya əvvəllər dövlət qulluğunda işləmiş və müvafiq ixtisas dərəcəsinə malik olan şəxslər;

- elmi dərəcəsi olan şəxslər.

Sınaq müddəti müəyyən edilmiş şəxslər üçün daxil olduqları vəzifədən və hazırlıq səviyyələrindən asılı olaraq altı aya qədər sınaq müddəti müəyyən ediləcək. Sınaq müddəti müəyyən edilmiş şəxslər xüsusi rütbə verilmədən müvafiq vəzifəyə təyin olunacaq və onlar həmin müddət ərzində yalnız vəzifə maaşı alacaqlar.

Sınaq müddəti gömrük orqanına işə qəbula dair əmrdə göstəriləcək. Sınaq müddəti Dövlət Gömrük Komitəsi (DGK) tərəfindən qısaldıla bilər.

Müəyyən edilmiş müddətin nəticələri sınaq müddəti müəyyən edilmiş şəxsə təyin olunan mentor, habelə ilkin peşə hazırlığı kursunu həyata keçirən Dövlət Gömrük Komitəsinin Akademiyası tərəfindən qiymətləndiriləcək.

Mentor tərəfindən verilən tapşırıqların icrasının nəticələri nəzərə alınmaqla onların yerinə yetirilməsi sınaq müddətinin sonunda mentor tərəfindən aşağıdakı qaydada qiymətləndirilir və verilmiş qiymətlər əsaslandırılır:

- 5 (yüksək) - tapşırıqlar tələb olunan səviyyədən daha yüksək keyfiyyətlə və müəyyən edilmiş icra müddətindən əvvəl yerinə yetirildikdə;

- 4 (yaxşı) - tapşırıqlar tələb olunan səviyyədə və müəyyən edilmiş icra müddətində yerinə yetirildikdə;

- 3 (kafi) - tapşırıqlar tam həcmdə yerinə yetirilmədikdə və sınaq müddəti müəyyən edilmiş şəxsin bilik və bacarıqlarının inkişaf etdirilməsinə ehtiyac olduqda;

- 2 (qeyri-kafi) - tapşırıqlar yerinə yetirilmədikdə.

Tapşırıqlar üzrə verilmiş qiymətlərin cəmi onların sayına bölünməklə orta qiymət balı müəyyən ediləcək.

Mentorun yekun qiyməti üç bal və daha yüksək olduqda nəticə məqbul hesab olunacaq.

Bundan başqa, peşə bacarıqlarının, həmçinin etik davranış qaydalarına və xidməti intizama riayət etmənin qiymətləndirilməsi aparılacaq.

Sınaq müddətinin qiymətləndirilməsinin nəticələri ilə razı olmayan sınaq müddəti müəyyən edilmiş şəxs həmin nəticələrdən inzibati və (və ya) məhkəmə qaydasında şikayət etmək hüququna malikdir.

Komitənin tabeliyində olan qurumlarda praktiki tibb və ya əczaçılıq fəaliyyəti, habelə tədris fəaliyyətinin həyata keçirilməsi üzrə xüsusi rütbə nəzərdə tutulan vəzifələrə ilk dəfə təyin olunan şəxslərin sınaq keçməsi DGK-nin insan resursları sahəsində təşkilati və nəzarət funksiyalarını həyata keçirən struktur bölməsi ilə razılaşdırılmaqla həmin qurumlar tərəfindən həyata keçiriləcək.

Telegramda izləyin